ދެއަންބަށް މީހަކާ އިނުމަކީ މީހެއްގެ ޙައްޤަކަށް އަރައިގަތުމެއް ނޫންކަމަށާއި، އެއީ ﷲ ސުބްޙާނަހޫ ވަތަޢާލާ ޝަރްޢުކުރައްވައި ހުއްދަކުރައްވާފައިވާ، ފިރިމީހާއަށް ލިބިގެންވާ ޙައްޤެއް ފިރިމީހާ ބޭނުން ކުރުންކަމުގައި އައްޝައިޚް މުޙައްމަދު ޝާފިޢު ވިދާޅުވެއްޖެއެވެ.
ޝައިޚުގެ ފޭސްބުކް ޕޭޖުގައި ވަރަށް ތަފުޞީލީ ގޮތެއްގައި ލިޔުއްވާފައިވާ ސްޓޭޓަސްގައި ރާއްޖޭގެ ވަރަށް ގިނަ މީހުންގެ ހިތުގައި އޮންނަ ގިނަ ސުވާލުތަކަކަށް ޖަވާބުދެއްވާފައި ވެއެވެ. އެގޮތުން ދެ އަންބަށް ކައިވެނި ކުރުމަކީ ދޮށީ އަނބީގެ ދިރިއުޅުން ހަލާކުކޮށްލުމެއްވެސް ނޫންކަމަށާއި، ދިރިއުޅުމުގެ ތެރެއަށް ވަދެގަތުމެއްވެސް ނޫންކަމަށް ލިޔުއްވާފައި ވެއެވެ. އަދި އެއީ ދޮށީ އަންބަށް އަނިޔާވެރިވުމެއްވެސް ނޫންކަމަށާއި، މާތް ﷲ ގެ ޝަރީޢަތުގައި އަނިޔާވެރިކަމެއް ޝަރްޢުކުރައްވާފައި ނުވާކަމަށެވެ. އެ އިލާހީ އަނިޔާވެރިވެވޮޑިގަންނަވާ އިލާހެއް ނޫނެވެ.
ދެ އަނބީން ތިބޭ މީހަކު، އޭނާގެ ދެ އަނބިންގެ މެދުގައި ޢަދުލުވެރިވާން ޖެހޭނެކަމަށާއި، ދެ އަނބީން ހަމަކުރުން އޭނާއަށް ހުއްދަވަނީވެސް ޢަދުލުވެރިވުމުގެ ޝަރްޠުފުރިހަމަވާނަމަ ކަމަށެވެ. އެހެންކަމުން، އެއް އަނބި ރުޅި އައިސްދާނެތީ އަނެއް އަނބި ކައިރިއަށް ނުގޮސް، ރޭނުކޮށް، އެއް އަނބި ރުޅި އައިސްދާނެތީ އަނެއް އަންބަށް ޚަރަދު ނުކޮށް، ނުވަތަ އަދާކުރަންޖެހޭ ޙައްޤުތައް އަދާނުކޮށް ހުންނަނަމަ، އެ ޙާލަތުގައި ފިރިމީހާ ފާފަވެރިވާނެ ކަމަށެވެ.
ކައިވެނީގެ އިސްމީހަކީ ފިރިމީހާ ކަމަށާއި، ފިރިމީހާގެ މައްޗަށް ބަސްކިޔައި ފިރިމީހާއަށް އަމުރުކޮށް، ފިރިމީހާ ޢަދުލުވެރިވުމުން ބޭރުވުމަށް އަމުރުކޮށް، އަނެއް އަނބިމީހާގެ ޙައްޤުތައް ދަމައިގަތުމުގެ ޙައްޤު އެއްވެސް އަންބަކަށް ލިބިގެން ނުވާކަމަށެވެ. އެއްވެސް އަންބަކު އެގޮތަށް ކަންތައްކުރާނަމަ އެމީހަކު ފާފަވެރިވާނެ ކަމަށެވެ. ދެ އަނބީންނަށްވެސް ވަނީ ފިރިމީހާއަށް ހެޔޮކަންކަމުގައި ކިޔަމަންތެރިވެ، ދެއަނބީންގެ މެދުގައި ޢަދުލުވެރިވުމުގެ ފުރުޞަތު ފިރިމީހާއަށް ދިނުންކަމަށެވެ.
