20 ވަނަ ރައްޔިތުންގެ މަޖިލިސްގައި އެމްޑީޕީ ތަމްސީލުކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ ބާއްވާ ތާރީޚަކީ 3 ފެބުރުއަރީ 2024 ކަމުގައި މިއަދު އިޢުލާންކޮށްފިއެވެ.

އެމްޑީޕީ އިން އިޢުލާންކޮށްފައި ވާ ލިސްޓްގައި ވާގޮތުން ށ. އަތޮޅުގައި ހިމެނޭ ހަތަރު ދާއިރާގެ ތެރެއިން ޕްރައިމަރީއެއް ބާއްވަން ޖެހިފައި ވަނީ ހަމަ އެކަނި ކޮމަންޑޫ ދާއިރާގައެވެ. އެމްޑީޕީ ކޮމަންޑޫ ދާއިރާއަށް ތިން ފަރާތަކުން ޝައުޤުވެރިކަން ފާޅުކޮށް ނަން ހުށަހެޅި ނަމަވެސް އޭގެ ތެރެއިން އެކެއްގެ ނަން ވަނީ އަނބުރާ ނަގާފައެވެ. އެމްޑީޕީ އަށް މިވަގުތާއި ޙާލަތަށް އެންމެ ފައިދާކުރަނިވި ގޮތަކީ ޕްރައިމަރީ އިންތިޚާބެއް ނުބޭއްވުންކަމަށް ފެންނާތީކަމަށް ބުނެ ނަން ނަގާފައި ވަނީ ޒަކީއެވެ. އޭނާ ނަން ނަގާފައި ވަނީ ޕްރައިމަރީގައި ވާދަކުރުމަށް ނަން ހުށަހަޅުއްވާފައި ވާ ކޮމަންޑޫ ކައުންސިލްގެ ރައީސް މުޙައްމަދު ސިނާން އަށް ތާޢީދުކުރާކަން ފޭސްބުކް މެދުވެރިކޮށް އިޢުލާންކުރުމަށް ފަހުގައެވެ. ދެން ޕްރައިމަރީގައި ވާދަކުރަނީ ޤާނޫނީ ވަކީލް މުޙައްމަދު ނިޝާން އިބްރާހީމް އެވެ.

އެމްޑީޕީގެ އިޢުލާންގައި ކެންޑިޑޭޓް ނަންބަރުތައް ވެސް ވަނީ ތަރުތީބުކޮށް ޢާންމުކޮށްފައެވެ. އެގޮތުން ކޮމަންޑޫ ދާއިރާގެ މަޖިލިސް ޕްރައިމަރީގައި ކެންޑިޑޭޓް ނަންބަރު 1 ލިބިފައި ވަނީ ސިނާންއަށެވެ. އަދި 2 ލިބިފައި ވަނީ ނިޝާންއަށެވެ. ދެ ކެންޑިޑޭޓުން ވެސް ޓިކެޓް ކަށަވަރުކުރުމަށްޓަކައި ދާއިރާގައި ތިން ރަށުގައި ގެންދަނީ ކެމްޕެއިން ކުރަމުންނެވެ. ށ. އަތޮޅުގެ އަނެއް ތިން ދާއިރާގައި ޕްރައިމަރީއެއް ބާއްވާކަށް ނުޖެހުނެވެ.