ޕީޕީއެމް-ޕީއެންސީ މަޖިލިސް ޕްރައިމަރީ މިމަހުގެ 27 ވަނަ ދުވަހު ބޭއްވުމަށް ހަމަޖެހިފައި ވާއިރު، ކޮމަންޑޫ ދާއިރާގައި ވާދަކުރާ ކެންޑިޑޭޓުންގެ މެދުގައި ވާދަވެރިކަން ބޮޑުވެ ނުފޫޒު ފޯރުވުމުގެ ޝަކުވާތައް އިތުރުވެއްޖެއެވެ.

މި ޕްރައިމަރީގައި ވާދަކުރާ ކެންޑިޑޭޓުންނަކީ އިބްރާހީމް ވަޙީދު (ވައްޑެ) އާއި މުޙައްމަދު އިބްރާހީމްއެވެ. ޚިޔާލު ހޯދުމުގެ ހުރިހާ ޕޯލްތަކުގެ ނަތީޖާތައް ދައްކާގޮތުން %65 ގެ އަޣުލަބިއްޔަތުން ޕްރައިމަރީ ކާމިޔާބު ކުރާނީ ޒުވާން ކެންޑިޑޭޓް ވައްޑެއެވެ. އަދި ވައްޑެއަށް އޮތް ތާޢީދު އިތުރު ވަމުން ދާތީ، ވާދަވެރި ކެންޑިޑޭޓްގެ ކެމްޕެއިން ޓީމުން ނާޒާއިޒް ނުފޫޒު ފޯރުވަމުންދާކަމުގެ ތުހުމަތުތައް ވަނީ ކުރެވިފައެވެ. އެގޮތުން މެމްބަރޝިޕަށް ހުޅުވާލި ފުރުޞަތުގެ ވަގުތު ހަމަވުމުގެ ފަހުން ސީދާ މުޙައްމަދު އިބްރާހީމްގެ ހަގު އަނބި ވެސް މީހުންނަށް ގުޅައިގެން ފޯމް ފުރާ ލިސްޓަށް އިތުރުކޮށްފައި ވާކަމަށް ޚަބަރުތައް ލިބެއެވެ.

ޢާންމު ރައްޔިތުންނާއި ގުޅިގެން ވައްޑެގެ ޓީމުން ރީތުކޮށް ކެމްޕެއިންކޮށް އިންތިޚާބު ކާމިޔާބުކުރުމަށް މަސައްކަތްކުރާ އިރު، އަނެއް ކޮޅުން މުޙައްމަދު އިބްރާހީމް އާއި ޕާޓީގެ އިސް ބައެއް ފަރާތްތަކާއި ގުޅިގެން އިންތިޚާބަށް ނުފޫޒު ފޯރުވަން މަސައްކަތް ކުރަމުން ގެންދާތީ ތިން ރަށުގައި ތިބި އިންސާފަށް ލޯބިކުރާ ފަރާތްތަކާއި، ވައްޑެއަށް ތާޢީދުކުރާ ފަރާތްތަކުން ގެންދަނީ ނުރުހުން ފާޅުކުރަމުންނެވެ. އަދި މުޙައްމަދު އިބްރާހީމް އަކީ މަޖިލިސްގެ ބަހުސެއްގައި ވާހަކަދައްކާލެވޭނެ ފެންވަރުގެ މީހަކަށް ވެސް ނުވާތީ، އޭނާ ފަހަތައް ޖެހުމަށް ގޮވާލާ އަޑުތައް ދާއިރާގެ ތިން ރަށުގައި ވެސް ދަނީ ގަދަވަމުންނެވެ.

މުއްދަތު ހަމަވި ފަހުން ފޯމްތައް ވައްދާ މަންޒަރު ފެންނަ ޕޮޓޯއެއް ޙިއްސާކުރުމަށް ފަހު މީހަކު ފޭސްބުކްގައި ބަޔާންކޮށްފައި ވަނީ ގޭގައި އައިސް ކްރީމް ބޯން އިނދެގެން ކާމިޔާބުކުރަން ބުނި ބަޔަކު ވަގުތު ހަމަވި ފަހުން ފޯމްތައް ޕާޓީ އޮފީހަށް ވައްދަން އުޅެނިކޮށް ފަޅާއަރާ ރަނގަޅަށް ރަކިވެއްޖެ ކަމަށެވެ. މިފަދަ މުހިންމު ވޯޓެއްގައި ވެސް މަކަރާ ޔަހޫއްޖާ ނޫން އެއްޗެއް ދަންނަ ބައެއް ނޫންކަމަށާއި، ޕާޓީގެ މެންބަރުން ބޮޑުތަނުން ނޫނެކޭ ބުނާނެކަމަށެވެ.

ދާއިރާގައި ހިމެނޭ ތިން ރަށުގައި ވެސް މިހާރު ތާޢީދު ބޮޑީ އިބްރާހީމް ވަޙީދު (ވައްޑެ) އަށް ކަމަށް ވެއެވެ. މުޙައްމަދު އިބްރާހީމް އަށް ކުރިން ފޯކައިދޫގައި އޮތް ތާޢީދު ވެސް މިހާރު ފަނޑު ވެއްޖެއެވެ. އެހެންކަމުން ދާއިރާގެ ސިޔާސީ މަސްރަޙް ދިރާސާކުރާ ފަރާތްތަކުން ދެކޭގޮތުގައި ޕީއެންސީ މަޖިލިސް ޓިކެޓް ވައްޑެ ކަށަވަރު ކުރާނެއެވެ. އަދި މިއީ ޕާޓީގެ އެތެރޭގެ އިންތިޚާބަކަށް ވީތީ އެންމެ މަސްލަޙަތު ހުރި ގޮތަކީ ނުފޫޒްތައް ބޭނުން ނުކޮށް ޑިމޮކްރެސީގެ ހަމަތަކާއި އެއްގޮތަށް އިންތިޚާބު ބޭއްވުމަށް ދެފަރާތުން ވެސް ފުރުޞަތު ދިނުމަކީ ކުރިއަށް އޮތް ރައްޔިތުންގެ މަޖިލިސް އިންތިޚާބަށް ކޮންމެހެން ވެސް ބޭނުން ވާނެކަމަށެވެ.