ޕީއެންސީ ޕްރައިމަރީގައި ވާދަކުރާ ވިޔަފާރިވެރިޔާ މުޙައްމަދު އިބްރާހީމް އިންތިޚާބުގެ އިދާރީ އިންތިޒާމްތަކަށް ނުފޫޒު ފޯރިވާ މައްސަލައެއް ފެންމަތިވެ ޕާޓީގެ ޢާންމު މެންބަރުންގެ ތެރޭގައި ޚިޔާލުތަފާތުވެ ޝަކުވާ ބޮޑު ވެއްޖެއެވެ.
ދާއިރާގެ ރައީސްކަމުގައި ވިޔަސް މިހާރު މުޙައްމަދު އިބްރާހީމް އަކީ އިންތިޚާބުގައި ވާދަކުރާ ކެންޑިޑޭޓަކަށް ވެފައި، ހުރިހާ ކެންޑިޑޭޓުންނަށް ވެސް ހަމަ ހަމަ ފުރުޞަތު ލިބެން ޖެހޭނެކަމަށް ގިނަ ބަޔަކު ދެކެއެވެ. އެހެން ނަމަވެސް އެފަދަ އެއްވެސް ކަމަކަށް އެއްވެސް ވަރަކަށް ބެލުމެއް މަޝްވަރާކުރުމެއް ނެތި، ޕްރައިމަރީގެ އިދާރީ މޭޒަށް އޭނާއަށް ތާޢީދުކުރާ ފަރާތައް ހަމަޖެއްސުމަށް ނަންތައް ފޮނުވާފައި ވާކަމަށް ތުހުމަތު ކުރެއެެވެ.
ޚަބަރު ލިބޭގޮތުގައި ޕާޓީން ނިންމާފައި ވަނީ 3 ރަށުގެ ސްޓިއަރިންގ ކޮމިޓީގައި މަޝްވަރާކުރުމަށް ފަހު އިދާރީ މޭޒަށް މީހުންގެ ނަން ހުށަހެޅުމަށެވެ. އެހެން ނަމަވެސް ކޮމަންޑޫ ސްޓިއަރިންގ ކޮމިޓީގެ ރައީސް އިސްމާޢީލް އިބްރާހީމް އާއި، މަރޮށީ ސްޓިއަރިންގ ކޮމިޓީގެ ރައީސް ޖާދުﷲ އާއި އެކަމުގެ އެއްވެސް މަޢުލޫމާތެއް ޙިއްސާކޮށްފައި ނުވާކަމަށާއި، މުޙައްމަދު އިބްރާހީމް ބޭނުންވާ ބައެއްގެ ނަންތައް ފޮނުވީކަމަށެވެ.
ޕީއެންސީ ކޮމަންޑޫ ދާއިރާގެ ސޯޝަލް މީޑިޔާ އެކްޓިވިސްޓުން ތުހުމަތުކުރާ ގޮތުގައި ނުފޫޒު ފޯރުވަނީ 3 ރަށުގައި ވެސް އެކަށީގެންވާ މިންވަރުގެ ތާޢީދެއް ނެތުމުންކަމަށެވެ.
