ކުރީގެ ރައްޔިތުންގެ މަޖިލިސްގެ ބ. އަތޮޅުގެ ޢިއްޒަތްތެރި މެންބަރު ދޮންފަނު މުޙައްމަދު ޔޫސުފް އާއި، ގ. ސަންސަންގެ އާގޭ ރަޝީދާ އިބްރާހީމް ދީދީއަށް ލިބިވަޑައިގެންނެވި ދެ އަންހެން ބޭފުޅުންގެ ތެރެއިން އެއް ބޭފުޅެއްކަމަށްވާ އާމިނަތު މިޔާދާ (އާނަ) ރައްޔިތުންގެ މަޖިލިސްގެ ގަލޮޅު އުތުރު ދާއިރާއަށް ވާދަކުރައްވަން ނިންމަވައިފިއެވެ.
އެގޮތުން 27 ޖެނުއަރީ 2024 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ޕީޕީއެމް/ޕީއެންސީ މަޖިލިސް ޕްރައިމަރީގައި އާނަ ވާދަކުރައްވާނެކަން މިލައުތުރު އޮންލައިންއަށް ވަނީ ޔަޤީންކޮށްދެއްވާފައެވެ. ތަޢުލީމީ ދާއިރާ އިން ޑިގްރީ އާއި ވިޔަފާރީގެ ދާއިރާއިން މާސްޓަރސް ޑިގްރީ ޙާޞިލްކުރައްވާފައިވާ އާމިނަތު މިޔާދާ އަކީ 12 އަހަރު ދުވަހުގެ ކިޔަވައިދިނުމުގެ ތަޖުރިބާ އާއި ސްކޫލް ހިންގުމުގެ ތަޖުރިބާތައް ވެސް ލިބިވަޑައިގެން ހުންނެވި ބޭފުޅެކެވެ.
އަދި އާނަ އަކީ 2005 ވަނަ އަހަރުން ފެށިގެން ދިވެހިރާއްޖޭގައި މިހާތަނަށް ބޭއްވުނު ހުރިހާ އިންތިޚާބުތަކެއްގައި ހެން އޮފިޝަލުން ތަމްރީން ކޮށްދެއްވުމާއި، ކޯޑިނޭކުރެއްވުމުގައި މުހިންމު ދަޢުރެއް އަދާކުރައްވާފައިވާ ފަރާތެކެވެ. އަދި އިންތިޚާބީ އޮފިޝަލުންގެ މެދުގައި ވަރަށް މަޤްބޫލް ފަރާތެކެވެ.
މިލައުތުރު އޮންލައިންގެ ފަރާތުން އާނަދައްތަ އާއި ބައްދަލުކޮށް ބައެއް ސުވާލުތައް ކޮށްލުމުގެ ފުރުޞަތު ވަނީ ލިބިފައެވެ. ވަރަށް ހިތް ހެޔޮކަމާއި ހިނިތުންވުމާއި އެކު ދެއްވި ޖަވާބުތައް މި އާޓިކަލްގައި ހިމަނާލެވިފައި ވާނެއެވެ.
އާނަދައްތަ ކިއުނީ ކިހިނެތްތޯ؟
ދިވެހިރާއްޖޭގެ ޤައުމީ ޓީވީގައި އެންމެ ފުރަތަމަ ހުށަހެޅި ކުޑަކުދިންގެ ވެރައިޓީ ޝޯވް ހުށަހެޅުއްވައިދެއްވީ އާނަ އާއި ޝަމްމޫންއެވެ. އެހިސާބުން ފެށިގެން ހުރިހާ ކުޑަކުދިން ވެސް ކިޔަން ފެށީ އާނަދައްތައެވެ. އަދި އެތަކެއް އަހަރުތަކެއް ވަންދެން ރާއްޖޭގެ ހުރިހާ ކުޑަ ކުދިންގެ މުނިފޫހި ފިލުވައިދެއްވި ދައްތަ އަކީ އާނަދައްތައެވެ. އަދި މިހާރު ވެސް ސްކޫލްތަކުގައި ބާއްވާ ކުޑަ ކުދިންނަށް ވާހަކަ ކިޔައިދިނުމުގެ ޙަރަކާތްތަކުގައި ބައިވެރިވެ، ވާހަކަ ހުށަހަޅައިދެއްވައެވެ.
އާނަގެ ބޮލުގައި އަބަދުވެސް ރީތި މަލެއް ޖަހާފައި އިންނަނީ ކީއްވެތޯ؟
އާނަ ފާހަގަކުރެވިފައި ވަނީ ކުޑައިރުއް ސުރެ ވެސް ޤުދުރަތީ ވެއްޓާއި، މާމެލާ މެއްޔަށް ލޯބިކުރާ ފަރާތެއްގެ ގޮތުގައެވެ. މަލަށް އޮންނަ ލޯބި އަބަދުވެސް އާނަގެ ބޮލުގައި ޖަހާލާފައި އިންނަ ޤުދުރަތީ މަލުން ޔަޤީންވެއެވެ. އަދި އެއްވެސް ފޫހިކަމެއް ނެތި ބޮލުގެ ކަނާއަތް ފަރާތުގައި އެމާ ޖަހަމުން ގެންދާތާ 23 އަހަރަށް ވުރެން ވެސް ގިނަ ދުވަސް ވެއްޖެއެވެ. އާނަ އާއި ބައްދަލުވާ ކޮންމެ މީހަކާ ވެސް ބައްދަލުކުރަނީ އެ ރީތި މަލާ ހިނިތުންވުމާއި އެކުގައެވެ.
އާނަގެ ފަރާތުން ލިބެމުންދާ އޯގާތެރި ޚިދުމަތް:
ރާއްޖޭގެ ގިނަ ބަޔަކަށް އާނަ އެނގޭ އަނެއް ގޮތަކީ ލަންކާއަށް ބޭސްފަރުވާއަށް ދާ ބަލިމީހުންނަށް ހިތް ހެޔޮކަމާއި އޯގާތެރިކަމާއި އެކު މުޢާމަލާތްކޮށް އެހީތެރިވެދިން މީހެއްގެ ގޮތުގައެވެ. އެގޮތުން އޭނާ ވަނީ އާސިރީ ސެންޓްރަލް އާއި ނަވަލޯކާ ހޮސްޕިޓަލްގެ އެސިސްޓެންޓް މެނޭޖަރ އިންޓަނޭޝަނަލް މާކެޓިންގ ގެ މަޤާމުގައި 6 އަހަރު ބައި ހޭދަކުރައްވާފައެވެ. އަދި އެދުވަސްވަރުގައި ބޭސްފަރުވާއަށް ލަންކާއަށް ދާ ހަމަ ކޮންމެ މީހަކު ވެސް އާނަގެ އެހީތެރި ޚިދުމަތުގެ ވާހަކަ ދައްކާ އުޅުނެވެ. ޢާންމުންނަށް އާނަ އެނގެނީ ކިހާ މިންވަރަކަށްތޯ ބެލުމުގެ ގޮތުން އާނަ ދަންނަންތޯއޭ އަހާލުމުން ލިބެނީ ހަމަ އެއް ޖަވާބެއް، “އެއީ ވަރަށް ހިތް ހެޔޮ މީހެއް” މިހެންނެވެ.
އިންސާނީ ޚިދުމަތަކީ އަމިއްލަ އިސްނެގުމެއް!
އާނަ އަކީ ކުރިން ވެސް އަދި މިހާރު ވެސް މީހުންނަށް އެހީތެރިވެދީ އުޅޭ ވަރަށް ހިތްހެޔޮ މީހެކެވެ. އިންސާނިއްޔަތަށްޓަކަައި ޚިދުމަތްތެރި ޚާދިމެކެވެ. ހިލޭސާބަހަށް ޚިދުމަތްކުރެއްވުމުގައި ލާމަސީލު މިސާލެކެވެ. ކޮންމެތާކު މަސައްކަތް ކުރެއްވިކަމުގައި ވިޔަސް ދިވެހި ރައްޔިތަކަށް ޚިދުމަތެއް ކޮށްދެވޭނެ ގޮތަކީ ކޮބައިތޯ ބައްލަވައެވެ. މިސާލަކަށް ލަންކާގެ އާސިރީ ހޮސްޕިޓަލްގައި މަސައްކަތް ކުރެއްވި ދުވަސްވަރު އާސިރީގެ ފަރާތުން ޚާއްސަ ޑަކްޓަރުންގެ ޓީމެއް ގެނެސް ހދ. ކުޅުދުއްފުށީގައި މެޑިކަލް ކޭމްޕެއް ބާއްވާފައި ވެއެވެ.
އަދި ނަވަލޯކަ ހޮސްޕިޓަލްގައި މަސައްކަތްކުރެެއްވި ދުވަސްވަރު، އައްޑޫގައި އެ ހޮސްޕިޓަލްގެ ޚާއްޞަ ޑަކްޓަރުންގެ މެޑިކަލް ކޭމްޕެއް ބާއްވާފައި ވެއެވެ. އަދި އެންމެ ފާހަގަކޮށްލެވޭ ކަމަކީ މިހުރިހާ ކަމެއް ވެސް ކުރައްވާފައި ވަނީ ހިލޭ ސާބަހަށް ކަމެވެ.
އަދި މީގެ އިތުރުން ހުޅުމާލޭގައި ހުންނަ ޓްރީ ޓޮޕް ހޮސްޕިޓަލުގެ ފްލޯ މެނޭޖަރުކަން ވެސް ކުރައްވާފައި ވެއެވެ.
މަޖިލިސް އިންތިޚާބަށް ކުރިމަތި ލައްވަން ނިންމެވީ ކީއްވެ؟
އާނަގެ އެންމެ ބޮޑު މަޤްޞަދަކީ ޤައުމަށާއި ރައްޔިތުންނަށް އިހުނައްވުރެ ވެސް އިތުރު އަދި ރަގަޅު ޚިދުމަތެއް ފޯރުކޮށްދީ ދިވެހި މުޖުތަމަޢަކީ އުފާވެރި ދުޅަހެޔޮ، ދިރިއުޅެން ރައްކާތެރި އަދި ފަސޭހަ ތަނަކަށް ހެދުމެވެ. މިހާރުގެ އިދާރީ ހިންގުމުގެ ނިޒާމާއި ސިޔާސީ ނިޒާމް ތަރުތީބުވެފައި އޮތްގޮތުން އާނަގެ ޚިދުމަތް އެހެން ހަރުފަތަކަށް ގެންދިއުމަށް ޙައިސިއްޔަތެއް ބޭނުންވާކަމަށް ވެސް ފެންނާތީއެވެ.
ކޮންމެ ރައްޔިތަކު ގޮވާލިޔަސް އެހީތެރިވުމަކީ އާނަ ވަރަށް ބޮޑު ހިތްހަމަޖެހުމަކާއި އުފަލެއް ލިބޭ ކަމެކެވެ. މީހުންނަށް ޙަމްދަރުދީވެ އޯގާތެރިކަމާއި އެކު އަޅާލުމަކީ އާނަގެ ތަބީޢަތުގައި ވެސް ހުންނަ އަޚްލާޤީ މާތް ސިފައެކެވެ.
ޕީޕީއެމް/ޕީއެންސީ މަޖިލިސް ޕްރައިމަރީގައި އާނަ ވާދަކުރައްވަނީ އޭނާ އުފަންވި އަދި ދިރިއުޅޭ ދާއިރާކަމަށްވާ ގަލޮޅު އުތުރު ދާއިރާއަށެވެ. ކެންޑިޑޭޓް ނަންބަަރަކީ (6) އެވެ.
