މުޅި ދިވެހިރާއްޖޭގައި ވެސް މިވަގުތު ސިޔާސީ ފޯރި އެންމެ ގަދަ އެއްތަނަކީ ށ. ފޯކައިދޫގައި އޮންނަ އުސްފަސްގަނޑު ކަމުގައި ބުނުމަކީ ދޮގަކަަށް ނުވާނެއެވެ.
މިފަހަކަށް އައިސް ކޮންމެ ރެޔަކީ ވެސް ފޯކައިދޫ އުސްފަސްގަނޑުގައި ސިޔާސީ ބޮޑު ކޯޅުމެއް ހިނގާ ރެޔެކެވެ. ސަރުކާރު ހިންގާ ޕާޓީކަމުގައިވާ ޕީއެންސީގެ ސަޕޯޓަރުން ކަރާފަޅާ ފަސްގަނޑަކީ ވެސް އެއީ އެވެ. އަދި އިދިކޮޅު އެމްޑީޕީގެ ސަޕޯޓަރުން ޖޯލި ސައްލާކުރާ ފަސްގަނޑަކީ ވެސް ހަމަ އެއީ އެވެ. އެހެންކަމުން އެތަން ހޯދުމުގައި ބޮޑު ވާދަވެރިކަމެއް ވަނީ އުފެދިފައެވެ. އަދި ބައެއް ޙާލަތްތަކުގައި ހަމަނުޖެހުން ބޮޑުވެ ގަޔަށް އަތްލާ ހިސާބަށް ވެސް ދާކަމުގެ މަޢުލޫމާތު ލިބެއެވެ.
ޕީއެންސީގެ ބައެއް ސަޕޯޓަރުން ދެކޭގޮތުގައި އެއްވެސް ހުއްދައެއް ހޯދުމަކާ ނުލާ އިޖުތިމާޢީ ސަރަަޙައްދުތަކުގައި ބެހެއްޓިފައި ހުންނަ ޖޯލިފަތިތަކާ ގޮނޑިތައް ސަރުކާރު ކެންޑިޑޭޓުގެ ކެމްޕެއިން ޙަރަކާތްތަކަށް ގެންދެވެން ވާނެކަމަށެވެ. އަދި ހަމަ އެގޮތަކަށް އެމްޑީޕީގެ ބައެއް ސަޕޯޓަރުން ދެކޭގޮތުގައި ކޮންމެ ވަގުތެއްގައި ވެސް އުސްފަސްގަނޑުގައި އެމީހުންނަށް ޙަރަކާތްތައް ހިންގެން ވާނެއެވެ. އެއީ އެމްޑީޕީގެ ސަރުކާރުގައި ހެދިފައި އޮތް އުސްފަސްގަނޑަކަށް ވާތީކަމަށް ބުނެއެވެ.
އެންމެ ފަހުން މަސްލަޙަތު ގޯސްވެ ބޮޑު ތަޅާފޮޅުމަކަށް އެކަން ވެދާނެތީ، ފޯކައިދޫ ކައުންސިލްގެ ފަރާތުން އެމީހުންގެ މީޑިޔާ ގްރޫޕްގައި ވަނީ ޢުޞޫލްތަކެއް އިޢުލާންކޮށްފައެވެ. ފޯކައިދޫ ކައުންސިލްގެ ސެކްރެޓެރީ ޖެނެރަލް ދެއްވި އިރުޝާދުގައި ވާގޮތުން އިޖްތުމާޢީ ސަރަޙައްދުތަކުގައި ބަހައްޓާފައި ހުންނަ ޖޯލިފަތިތަކާ ގޮނޑި ފަދަ ތަކެތި ހުރިތަނުން އެހެން ތަނަކަށް ބަދަލުކުރަން ވާނީ ކައުންސިލްގެ ހުއްދަ ލިބިގެން ކަމަށެވެ.
ކައުންސިލްގެ އިރުޝާދުތަކާ ގުޅިގެން އެންމެ ފުރަތަމަ އުސްފަސްގަނޑުގައި ސިޔާސީ ޙަރަކާތްތައް ހިންގުމަށް ހުއްދައަށް އެދިފައި ވަނީ އެމްޑީޕީގެ ފަރާތުންނެވެ. އަދި ފަސްގަނޑުގެ އެއްބައި މިހާރު ވަނީ އެމްޑީޕީގެ ޙަރަކާތްތައް ހިންގުމަށް ކަނޑައަޅާ ހުއްދަ ދީފައެވެ. އަދި ލަފާކުރެވޭގޮތުގައި އުސްފަސްގަނޑުގެ އަނެއްބައި ވެގެންދާނީ ޕީއެންސީ ސަޕޯޓަރުން ކަރާފަޅާ ތަނަކަށެވެ.
