ރާއްޖޭގައި މިހާރު މިއޮތް ޕީއެންސީ ސަރުކާރަށް މީގެ ފަސް ދުވަސް ފަހުން އެއް އަހަރު ފުރޭއިރު، ރައްޔިތުންނަށް ވީ އެއްވެސް ވަޢުދެއް ފުއްދިފައި ނެތްތާ ނުހަނު ބޮޑެތި ދަތިތަކާ ކުރިމަތިލާން ޖެހިފައި ވާތީ، ޒިންމާދާރު އިދިކޮޅު ސިޔާސީ ޕާޓީއެއްގެ ގޮތުގައި އެމްޑީޕީން މިރޭ އާޓިފިޝަލް ބީޗު ސަރަޙައްދުގައި އެމީހުންގެ ޙަޤީޤީ މަންޒަރު ދައްކާލައިފިއެވެ.
“ފުދިއްޖެ، ފުނޑިއްޖެ” ނަމުގައި އެމްޑީޕީން އިންތިޒާމުކުރި ޖަލްސާއަށް އެތައް ހާސް ބަޔަކު ވަނީ ޖަމާވެފައެވެ. އެސަރަޙައްދުގައި ޖަހާފައިވާ ގޮނޑިތަކުން ޖާގަ ނުލިބި ގިނަ ބަޔަކަށް ތިބެންޖެހިފައި ވަނީ ކޮޅަށެވެ. މި ޖަލްސާގައި ކުރީގެ ރައީސް އިބްރާހީމް މުޙައްމަދު ޞާލިޙާއި، އެމްޑީޕީގެ ޗެއާޕާރސަން އާއި، ޕާޓީގެ ރައީސްގެ އިތުރުން މަޖިލިސް މެންބަރުންނާއި، ޤައުމީ މަޖިލިސްގެ ގިނަ މެންބަރުންނާ ސަޕޯޓަރުން ބައިވެރިވެއެވެ.
ސަރުކާރަށް ވަރަށް ބޮޑަށް ފާޑުވިދާޅުވަމުން ޖަލްސާގައި ވާހަކަދެއްކެވި ބޭބޭފުޅުން ވިދާޅުވީ މި ސަރުކާރު އައިފަހުން ދިވެހި ރައްޔިތުންނަށް ހަމަޖެހުމެއް ނުލިބޭތާ ހަމަ ނޭވާއެއް ވެސް ލިޔަކަ ނުދޭކަމަށެވެ. އަދި ރައްޔިތުން މާޔޫސްވެއްޖެ ކަމަށާއި، ދޮގު މައްޗަށް ދޮގު ހަދާ ހަދާ ޑރ. ރައީސް މުޢިއްޒަކީ ކައްޒާބަކަށް ވެއްޖެ ކަމަށެވެ.
މަސްވެރިންނަށް ވެސް ވަނީ އޮޅުވާލާފައި ކަމަށާއި، ކުރިން ލިބެމުންދިޔަ ހެޔޮވަރުގެ އާމްދަނީ ވެސް މި ސަރުކާރުން ވަނީ ލޫޓުވާލާފައި ކަމަށެވެ. އެމްޑީޕީގެ ސަރުކާރުން ފަށާފައިވާ މަޝްރޫޢުތައް ހުއްޓުވާލާ ރައްޔިތުންނަށް ޖެއްސުން ނޫންކަމެއް ނުކުރާ ކަމަށެވެ.
އިޤްދިޞާދީ ޙާލަތު ގޯހުން ގޯހަށް އެޅި ސަރުކާރަށް ދަތުރުކުރާންވީ މިސްރާބު ވެސް އޮޅިފައިވާ ކަމަށެވެ. އަވައްޓެރި ޤައުމުތަކާ ޖެހި ފިތިބާރުވެފައި އޮތް ސަރުކާރަށް އެއްވެސް ޤައުމަކުން އަޅާލުމެއް ނުލިބުނު ކަމަށެވެ. ނާށިގަނޑު ހިފައިގެން ސަލާންޖެހުމަށް 100 އަށް ވުރެ ގިނަ ޤަައުމުތަކަށް ވަފުދުތައް ގޮސް އެތައް މިލިޔަން ރުފިޔާއެއް އިސްރާފު ކޮށްލައިފި ކަމަށެވެ.
ވިޔަފާރިތައް އިނދަޖެހިއްޖެ ކަމަށާއި، އެތައް ބައެއްގެ ވަޒީފާތައް ގެއްލިއްޖެ ކަމަށާއި، ކުންފުނިތައް ފުނޑާލައިފި ކަމަށާއި، ޓެކްސް މައްޗަށް ޓެކްސް ނަގައިގެން ވެސް ސަރުކާރެއް ހިންގާން ނޭނގޭ ނާޤާބިލު ސަރުކާރެއް ކަމަށެވެ. ތަންތަނުގެ އިސް މަޤާމުތަކަށް ކުފޫ ހަމަނުވާ މީހުން ލައިގެން މުޅި ހިންގުމުގެ ނިޒާމު ޚަރާބު ވެއްޖެ ކަމަށާއި، މިހާ އަވަހަށް ރައްޔިތުން ފޫހިކޮށްލި ސަރުކާރެއް ދިވެހި ތާރީޚު ވެސް ނުދެކޭ ކަމަށެވެ.
