ސަރުކާރު ޕްރޮމޯޓުކުރުމުގައި އެންމެ ޙަރަކާތްތެރި އެއް އެކްޓިވިސްޓަކީ ފުނަދޫ ދާއިރާގެ ޢިއްޒަތްތެރި މެންބަރު މުޙައްމަދު މަމްދޫހު (މަންޑޭ) ކަމަށާއި، އަބަދު އިންނަވަނީ ވެސް ޓީވީތަކުގައި ކަމަށާއި، ދާއިރާގެ ރަށް ރަށަށް ޒިޔާރަތްކުރުމެއް ނެތްކަމަށާއި، އެއްވެސް އެހެންކަމަކާ އަޅާނުލާކަމަށް ބުނެ ދާއިރާގެ ރައްޔިތުން ޝަކުވާކުރަން ފަށައިފިއެވެ.

މިލައުތުރާ ވާހަކަދެއްކި ބައެއް މީހުން ބުނިގޮތުގައި މަންޑޭގެ ކަމަކީ ސޯޝަލް މީޑިޔާގައި މޮޅެތި ގޮތް ގޮތަށް ސްޓޭޓަސްތައް ލިޔުމާއި، ޓީވީތަކުގައި މޮޅު ގޮތް ގޮތަށް ވާހަކަދެއްކުން ކަމަށާއި، ފުނަދޫ ފިޔަވާ އެހެން އެއްވެސް ރަށެއް ލޮލުގެ ހިމަކޮޅުން ވެސް ނުފެންނަ ކަމަށެވެ. އެހެންކަމުން ޒުވާން އެމްޕީއެއް ލިބިގެން ކުރި އުންމީދުތައް ގެއްލިއްޖެކަމަށެވެ.

އެމްޕީ މަންޑޭއަކީ ފުނަދޫ ދާއިރާގެ ރައްޔިތުން މިހާތަނަށް އެންމެ ލޯބިން އިންތިޚާބުކުރި މެމްބަރު ކަމަށާއި، ކޮންމެކަމެއް ކޮންމެ ގޮތަކަށް މެދުވެރިވެގްން ދިޔަކަމުގައި ވިޔަސް ރައްޔިތުންގެ ޙައްޤުގައި ވަކާލާތުކުރައްވާނެ ބޭފުޅެއްގެ ގޮތުގައި އުންމީދުކުރި ކަމަށާއި، މިހާ އަވަހަށް ބަދަލުވާނެ ކަމަށް އުންމީދު ވެސް ނުކުރާކަމަށެވެ.

މަޢުލޫމާތު ޙިއްސާކުރި ޒުވާނަކު ބުނިގޮތުގައި ފޭސްބުކްގައި ކޮންމެ ވާހަކައެއް ޖަހާފައި ވެސް ސީދާ ރައީސަށް ޓެގްކުރައްވާ ކަމަށާއި، އެއީ ވެސް މީހަކު ނެގެޓިވް ކޮމެންޓެއް ކޮށްފާނެތީ ކުރައްވާކަމެއް ކަމަށާއި، ގިނަ މީހުން އުޅެނީ ކޮންމެވެސް ވަޒީފާއެއްގާ ކަމަށްވާތީ، އެއްޗެއް ބުނަން ބޭނުންވިޔަސް ނުބުނެ މަޑުން ތިބެނީ އެހެންވެގެން ކަމަށެވެ.