ދައުލަތުގެ އެއް ބާރުކަމުގައިވާ ރައްޔިތުންގެ މަޖިލިސް އަކީ މިއަދު ރައްޔިތުންގެ އެއްވެސް ސަމާލުކަމެއް ނެތް ތަނަކަށްވެ، ކުރިން މަޖިލިސް ބަހުސް ވަގުތުން ބަލައިލުމަށްޓަކައި ވަގުތު ހުސްކޮށްގެން ރައްޔިތުން ޓީވީ ދޮށުގައި ތިބި ތިބުން މާޒީވެއްޖެއެވެ. މިހާރު އެއީ ތިބި ބައެއްކަން ވެސް ރައްޔިތަކަށް އެނގެނީ 5 އަހަރުގެ ދައުރެއް ނިމި އައު ދައުރަކަށް މެމްބަރުން ހޮވުމަށް ބާއްވާ އިންތިޚާބަށް ކެމްޕެއިނު ފެށުމުންނެވެ. އޭގެ ކުރިން ހިރުވާތަން ކަހާލާނެ މީހަކު ވެސް މިހާރަކު ނެތެވެ.
މިހާރު އޮތީ އަމިއްލަފުޅަށް މޮޅުވެފައި، ގަދަވެފައި، ސަޅިވެފައި ހުދުގަމީސް ތުރުކުރައްވައިގެން ކަފްލިން ޖައްސަވައިގެން ކުޑަތައް ދަށުގައި ބިޑިބޯން ތިބުމެވެ. މަޖިލިސްގައި ކުރެވޭ ބަހުސްތަކުގައި ނެތްފެންވަރު ދައްކަން އުޅޭ މަދު މެންބަރުންކޮޅެއްގެ ސޯޓު އަބަދު އޮންނަނީ އަމިއްލަފުޅަށް ބޭލިފައެވެ. އެކަމާ ގަންނާކުރައްވާ ބިރުންނާއި ލަދުފުޅުން އިންތިޚާބުވީންސުރެ، ޗުއްޕޭ ވެސް ވިދާޅުނުވާ ޢިއްޒަތްތެރި މެމްބަރުން ވެސް މަދެއް ނޫނެވެ.
ލަދެއް ހަޔާތެއް ނެތި މަގުތަކުގައި މީހުންގެ ގަޔަށް ބޮލަށާއި، މުދަލަށް އަރަމުން ދުވި އެތައް ބަޔަކު މިއަދު ރައްޔިތުންގެ ޢިއްޒަތްތެރި މަޖިލީހުގައި އެބަ ތިއްބެވިއެވެ. އެއްވެސް ޢިލްމެއް ނެތްތާ ހިލްމެއް ނެތަސް ފައިސާ ހުރީތީ ހަފޮޅުން އެތެރެ ވެވުނީތީއެވެ. އެހެން ނަަމަވެސް މިހާރު އެފަދަ މީހުންނަށް ވެސް ހީފުޅުވާ ގޮތުގައި އެއީ އެންމެ މޮޅު އަދި އެންމެ ގަދަ ބޭފުޅުންނެވެ.
އަނެއް ބަޔަކީ މުދާވެރި މަހުޖަނުންނެވެ. އެފަދަ މީހުން ނިސްބަތްވާ ދާއިރާ އާއި އެކި ގޮތް ގޮތުން ހިސޯރުކޮށްގެން އުޅޭ ދާއިރާތަކުގައި ސިޔާސީ ކަމަކަށް ކުރިމަތިލާން ކެރޭވަރުގެ މީހަކު އުފެދުނަސް ނުދެއްވައެވެ. ކޮންމެވެސް ސިފައެއްގައި އޮބަހައްޓައި އޮބިއަޅުއްވައިގެން ތާއަބަދަށް މަޖިލިސް ގޮނޑި ދިފާއުކުރައްވައެވެ. އެންމެ ފަހުން މަޖިލިސްގެ ޢިއްޒަތްތެރި ރިޔާސަތަށް ވެސް ރައްޔިތުން ދުވަހަކުވެސް އުންމީދު ވެސް ނުކުރާ ފަދަ ބޭފުޅަކު ތަޚުތުވެއްޖެއެވެ.
