ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ ރަށް ރަށަށް ވަަޑައިގަތުމުން ވަރަށް ހޫނު މަރުޙާބާއެއް ކިޔާ އިޙްތިރާމާއި ލޯބި ބަންޑުންކޮށްލާ މަންޒަރުތައް ފެންނާން ފަށައިފިއެވެ.

ސޯޝަލް މީޑިޔާގައި ފެތުރެމުންދާ ވާހަކަތަކާ މުޅިން ޚިލާފަށް ރަށް ރަށުގެ ރައްޔިތުން ބަނދަރުމައްޗަށް ނިކުމެ ކޮޅާ ކޮޅު ނުފެންނަ ވަރަށް ދިގު ސަފުތަކަށް އެތުރިލައި، ސެލްފީތައް ނަގާން ކިޔޫ ހަދާ މަންޒަރުތަކުން ރަމްޒުކޮށްދެނީ އެމަނިކުފާނު ތަންފީޒުކުރައްވަމުން ގެންދަވާ ސިޔާސަތުތައް ރައްޔިތުންނަށް ކަމުގޮސް ބަލައިގެންފި ކަމެވެ. ޑޮލަރުގެ ތާށިކަން ޙައްލުކުރެއްވުމަށް އެޅުއްވި ފިޔަވަޅުތަކާއި، އާސަންދަ އިސްލާޙް ކުރެއްވުމާއި، ޓެކްސް ބޮޑުކޮށް އާމްދަނީ އިތުރުކުރެއްވުމާއި، ދުންފަތް ކޮންޓްރޯލު ކުރެއްވުމާއި، ފެންވަރު ރަނގަޅު ބޭސް ހޯދުމާއި، ފަތުރުވެރިކަމުގެ ޞިނާޢަތް ފުޅާކުރެއްވުމާއި، ޤައުމީ އެއާލައިން ތަރައްޤީކުރެއްވުމާއި، ބަންކަރިން ޚިދުމަތް ތަޢާރަފުކުރެއްވުމާއި، ދަރަނި ކުޑަކުރެއްވުމުގެ އިތުރުން ސިޔާސީ މަޤާމުތައް މަދުކުރެއްވުން ހިމެނެއެވެ. އެމަނިކުފާނުގެ ވަޢުދުފުޅުތަކުގެ ތެރެއިން ބާކީ އޮތީ އިޒުރޭލުގެ ޕާސްޕޯޓުގައި ރާއްޖެ އެތެރެވުން މަނާކުރެއްވުން އެކަންޏެވެ.

އެމަނިކުފާނުގެ ރިޔާސީ ވަޢުދުތައް ފުއްދަވައި ނިމިފައިވާތީ މިހާރު ގެންދަވަނީ ރައްޔިތުންނަށް އިތުރު ކަންކަން ކޮށްދެއްވުމަށް ވަޢުދުތައް ވެވަޑައިގަންނަވަމުންނެވެ. އެގޮތުން ދާދިފަހަކުން ގުޅިއަށް ވަޑައިގެން އެ ރަށުގެ ރައްޔިތުންނަށް ބޭނުންވާ ހުރިހާ ކަމެއް ކޮށްދެއްވުމަށް ވަޢުދުވެވަޑައިގެންފައި ވެއެވެ. ހަމަ އެހެންމެ، ހުވަދު އަތޮޅުގެ ރަށް ރަށަށް ވެސް ބޭނުންވާ ކަންކަން ބެއްލެވުމަށް ފަހު، އެހުރިހާ ކަމެއް ވެސް ކޮށްދެއްވާނެކަމުގެ ޔަޤީންކަން ވަނީ ދެއްވާފައެވެ.