ކެނެޑާގެ އެތެރޭގެ ހަމަނުޖެހުންތައް އިންތިހާއަށް ގޯސްވެފައިވާތީ، ޤައުމީ މަސްލަޙަތު އިސްކުރައްވައި ބޮޑުވަޒީރު ކަމުންނާއި، ޕާޓީގެ ލީޑަރުކަމުން ޖަސްޓިން ޓްރޫޑޯ އިސްތިޢުފާދެއްވަން ނިންމަވައިފިކަން އިޢުލާން ކުރައްވައިފިއެވެ.
މި މަހުގެ 6 ވަނަ ދުވަހު، ބޮޑުވަޒީރު ޖަސްޓިން ޓްރޫޑޯ އެކަން އިއުލާނު ކުރައްވަމުން ވިދާޅުވީ، ކެނެޑާގެ ކުރިއަށް އޮތް އިންތިޚާބުގައި އެމަނިކުފާނަކީ އެންމެ ރަނގަޅު ކެންޑިޑޭޓަކަށް ނުވާނެ ކަމަށާއި، ޤައުމަށް އެންމެ މޮޅުގޮތް އަބަދުވެސް އެދޭކަމަށެވެ. އެހެންކަމުން މި ޕްރޮސެސް ވީހާވެސް އަވަހަކަށް ކުރިއަށް ގެންގޮސްދެއްވުމަށް ވެރިކަންކުރާ ލިބަރަލް ޕާޓީގެ ރައީސްގެ ފަރާތްޕުޅުން އެދިވަޑައިގެންފައި ވާނެކަމަށެވެ.
ބޮޑުވަޒީރު ޖަސްޓިން ޓްރޫޑޯގެ އިސްތިއުފާ ރަސްމީކޮށް ބަލައިގަންނާނީ ޕާޓީއަށް އައު ލީޑަރަކު އިންތިޚާބު ކުރުމަށް ފަހުގައެވެ. އެހެންކަމުން ލިބަރަލް ޕާޓީގެ ލީޑަރޝިޕް އިންތިޚާބު އަވަސްކުރުމަށް މިހާރު ވަނީ ލާޒިމުވެފައެވެ.
