ޕީއެންސީން ހިންގި “މެމްބަރޝިޕް ޑުރައިވް” ކެމްޕެއިންގައި ގިނަ އަދަދެއްގެ އައިޑީ ކާޑު ވަގަށް ނަގައިގެން ޞައްޙަނޫން އެތައް ސަތޭކަ ފޯމެއް އިލެކްޝަންސް ކޮމިޝަނަށް ހުށަހެޅިކަން ފަޅާއެރުމާއެކު މީހުންގެ ނުރުހުމާ މަލާމާތް ދަނީ ލިބެމުންނެވެ.
ޕީއެންސީއަށް ވަނަމަކަށް މިހާރު ކިޔާއުޅެނީ “ޕީއްޒާ ޕާޓީ” އެވެ. އެއީ ޑީއެންއާރުގެ ސިސްޓަމް ބޭނުންކޮށް، މީހުންގެ އައިޑީ ކާޑާ ފޮޓޯ ނަގައިގެން ޕީއެންސީއަށް ފޯމުފުރުމުގެ މަސައްކަތްކުރި މީހުންނަށް ހިތްވަރުދިނުމުގެ ގޮތުން ޕީއްޒާ ދެއްވީ ހޯމްލޭންޑް ސެކިއުރިޓީ މިނިސްޓަރ ޢަލީ އިހުސާން ކަމަށް ވެއެވެ. ޚުދު އެމަނިކުފާނު އަމިއްލަފުޅަށް ވެސް ވަނީ އެކަމަށް އިޢުތިރާފުވެވަޑައިގެންފައެވެ. ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގެ ބެލެނިވެރި ފަރާތަކީ ހޯމްލޭންޑް ސެކިއުރިޓީ މިނިސްޓަރުކަމަށް ވާތީ، ޑޭޓާބޭސްއަށް އެކްސެސް ލިބޭނީ މިނިސްޓަރުގެ ބައިވެރިވުމެއް އޮވެގެން ކަމަށް ތުހުމަތު ކުރެވެއެވެ. “ޕީއްޒާ ޕާޓީ” އޭ ކިޔަންފެށިފައިވަނީ މިކަމެއް ހިލުނު ފަހުންކަމަށް ވެއެވެ.
ޞައްޙަނޫން 300 އަށް ވުރެ ގިނަ ފޯމް ޕީއެންސީގެ ފަރާތުން އިލެކްޝަނަށް ހުށަހެޅިފައިވާ ކަމަށާއި، އެމައްސަލަ ތަޙުޤީޤުކުރަމުންދާ ކަމަށް ޕީއެންސީން ބުނެއެވެ. މިއީ ރާއްޖޭގައި އަބަދުވެސް ހިނގާކަމަކަށް ވީ ނަމަވެސް މި ސްކޭލްގައި އެހެން އެއްވެސް ބަޔަކު މިކަން ކޮށްފައެއް ނުވެއެވެ. މި މައްސަލައާ ގުޅިގެން މެމްބަރޝިޕް ފޯމް ބަލައިގަތުން ވެސް ވަނީ ހުއްޓާލާފައެވެ.
