ރ. މަޑުއްވަރީގެ އިޚްތިޞާޞްގައި އުފުލަންދޫ، އަދި ރ. މީދޫގެ އިޚްތިޞާޞްގައި ތާވަތާ ހިމެނުއްވުމަށް ނިންމަވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަން އިޢުލާންކުރައްވައިފިއެވެ. ރައީސުލްޖުމްހޫރިއްޔާ މިކަން އިޢުލާންކުރެއްވީ، ރ އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގައި ރ. މަޑުއްވަރީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ކަމަށް ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވާފައިވެއެވެ.
ސަރުކާރުތައް ބަދަލުވުމާ ގުޅިގެން ރާއްޖޭގެ އެކިއެކި ސަރަޙައްދުތަކުގެ ރައްތަކުގެ އިޚްތިޞާޞްތައް ބަދަލުވެ، ބައެއް ފަހަރު އިޚްތިޞާޞް ސަރުކާރުގެ ދަށަށް ގޮސް، އަނެއްބައިފަހަރު އިޚްތިޞާޞް ކައުންސިލްތަކުގެ ދަށަށް ބަދަލުވުމަކީ މިފަހަކަށް އައިސް ވަރަށް ގިނައިން ހިނގާކަމެކެވެ. ކައުންސިލަކުން ދުރާލައި ރާވާ މަޝްރޫޢުއެއް ހިންގުމަށް ވިޔަފާރި އުޞޫލުން ދޫކޮށްފައި ހުންނަ ބިންތަކާއި ފަޅުރަށްތައް ސަރުކާރު ބަދަލުވުމާއެކު މުޅީން އެހެންގޮތަކަށް ބަދަލުވާތަން ފެނެއެވެ. ކައުންސިލުގެ އިޚްތިޞާޞުން ފަޅުރަށުގެ އިޚްތިޞާޞް ވަކިކޮށް، ސަރުކާރުގެ ދަށަށް އިޚްތިޞާޞް ބަދަލުވުމުން، ދެން ވާނެ ގޮތް ނޭނގި ބައެއް ވިޔަފާރިތައްވެސް ހުއްޓި، ރަށު ކައުންސިލްތަކަށާއި ސަރުކާރުގެ ކުންފުނިތަކަށާއި އަމިއްލަ ވިޔަފާރިތަކަށްވެސް ބޮޑެތި ގެއްލުން ވެފައި އެބަހުއްޓެވެ.
ބެލެވޭ ގޮތުގައި އިޚްތިޞާޞްތަކަށް މިފަހަރު ސަރުކާރުން މިގެންނެވި ބަދަލަކީ އެ ރަށްތަކަށް ދިމާވެފައިވާ ބިމުގެ ދަތިކަމަށް އެދެވޭ ހައްލުތަކެއް ހޯއްދަވައި ދެއްވުމުގެ ބޭނުމުގައި ސަރުކާރުން ގެންނެވި ބަދަލެކެވެ. ރައީސުލްޖުމްހޫރިއްޔާ ޑރ.މުޢިއްޒުގެ ވާހަކަފުޅުން ދޭހަވާގޮތުން ރ. މަޑުއްވަރީގެ އިޚްތިޞާޞްގައި އުފުލަންދޫ، އަދި ރ. މީދޫގެ އިޚްތިޞާޞްގައި ތާވަތާ ހިމެނެއްވުމަށް ސަރުކާރުން ނިންމެވީ، ރަށުން ބިން ހިއްކިކަމުގައިވިޔަސް އެންމެ އެކަށޭނެ ޖާގަ ރަށުން ނުލިބޭތީ އެކަމާ ގުޅުވައިގެންނެވެ. ޢާންމު ޞިއްޙަތަށް ބައްލަވައި، ރަށުގައި އިޤްތިޞާދީ މަސައްކަތްތައް ކުރާ ތަންތަން ރަށުން ބޭރަށް ބަދަލުކުރުމުގެ ވިސްނުމުގައެވެ. ރައްޔިތުންގެ އުންމީދަކީ، އިޚްތިޞާޞް ދެކޮޅަށް ނުދަމައި ފަހުންވެސް މި ބަދަލު އެގޮތުގައި ދެމިއޮތުމެވެ.
