ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ މަދަނީ ޖަމިއްޔާތަކާ ބެހޭ ބައިން އިންތިޒާމުކުރި ދެވަނަ އެންޖީއޯ ޤައުމީ ފޯރަމް ކާމިޔާބުކަމާއެކު ރޭގައި ނިންމާލައިފި އެވެ.

ދެ ދުވަހުގެ މުއްދަތަށް ދެމިގެންދިޔަ މި ފޯރަމަކީ މަދަނީ ޖަމިއްޔާތައް ބާރުވެރިކުރުވުމަށް ބޭނުންވާ ސިޔާސަތުތައް ކަނޑައެޅުމުގައި ޖަމިއްޔާތަކުގެ ޚިޔާލު ހޯދުމަަށާއި، ޖަމިއްޔާތަކުގެ ހިންގުން ހަރުދަނާކުރުމަށް އެހީތެރިވެދިނުމުގެ މަޤުޞަދުގައި މިދިޔަ އަހަރުން ފެށިގެން ބާއްވަމުން އަންނަ ފޯރަމެކެވެ.

މިއަަހަރުގެ ޤައުމީ ފޯރަމުގައި 69 ޖަމިއްޔާ އާއި، އަންހެނުންގެ ތަރައްޤީއަށް މަސައްކަތްކުރާ 30 ކޮމިޓީ އާއި، 6 އަތޮޅު ކައުންސިލުން ބައިވެރިވެފައި ވެއެވެ. މި ފޯރަމް ކުރިއަށް ގެންދިޔައީ ހ. މީރުމާގެ ކޮންފަރެންސް ހޯލުގައެވެ.

މި މަހާސިންތާގެ ފެށުމުގެ ރަސްމިއްޔާއި، ނިންމުމުގެ ރަސްމިއްޔާތު ޝަރަފުވެރި ކޮށްދެއްވީ ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު އިބްރާހީމް ވަޙީދު އެވެ. މަދަނީ ޖަމިއްޔާތަކަށް އެހީތެރިވުމުގެ ގޮތުން އެ ވުޒާރާއިން ކުރިއަށް ގެންދަވާ ކަންކަމާއި، ކުރިއަށް ރާއްވަވާފައިވާ ކަންކަމުގެ މައްޗަށް އަލިއަޅުވާލައްވާ ވަޒީރު ވާހަކަފުޅު ދެއްކެވިއެވެ.

އެންޖީއޯ ޤައުމީ މަހާސިންތާ ނިންމާލެއްވީ ބައިވެރިންނަށާއި، އެހީތެރިވެދެއްވި ފަރާތްތަކުގެ އަގުވަޒަންކުރެއްވުމުގެ ގޮތުން ހަނދާނީ ލިޔުން ޙަވާލުކުރެއްވުމަށް ބޭއްވި ޚާއްސަ ރަސްމިއްޔާތަކަށް ފަހުގައެވެ.