30 ސެޕްޓެމްބަރު 2023 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސް އިން އަމަލުކުރާނެ ގޮތެއް ކަނޑައެޅުމަށްޓަކައި، ޓީޑީގެ އިންޓަރިމް ކައުންސިލުން ރޭގައި ޤަރާރެއް ފާސްކޮށްފިއެވެ. އެޕާޓީ އިން ރޭގައި ބޭއްވި އިންޓަރިމް ކައުންސިލްގެ ބައްދަލުވުމަށް ޤަރާރު ހުށަހެޅުއްވީ މުޙައްމަދު ޝިފާޒްއެވެ. އޭނާ ހުށަހެޅުއްވި ޤަރާރުގައި ވާގޮތުން އެމްޑީޕީ އާއި އެކު މަޝްވަރާ ކުރެވޭނީ 28 ސެޕްޓެމްބަރު 2023 ގައި ނިޒާމީ ވޯޓު ބޭއްވުމަށް 20 ސެޕްޓެމްބަރު 2023 ގެ ކުރިން އެއްބަސް ވާނަމައެވެ. އަދި ޕީއެންސީ އާއި އެކު މަޝްވަރާ ކުރެވޭނީ ޑރ. މުޢިއްޒުގެ ސަރުކާރުގައި ޓީޑީގެ ސިޔާސަތުތައް ހިމެނޭނެ މިންވަރާއި، ސަރުކާރުގެ ޙިއްސާ ލިބޭނެ ވަރެއް ހިމެނޭ އެއްބަސްވުމެއް ގައި ދެޕާޓީ އިން ސޮއި ކުރަން 20 ސެޕްޓެމްބަރު 2023 ގެ ކުރިން އެއްބަސް ވާނަމައެވެ. އަދި ދެ ޕާޓީއަށް ހުށަހެޅި ހުށަހެޅުން އެއްވެސް ޕާޓީ އަކުން ޤަބޫލުނުކޮށްފި ނަމަ، އެއްވެސް ކެންޑިޑޭޓަކަށް ތާޢީދުނުކޮށް ޓީޑީގެ ސިޔާސީ މަސައްކަތައިގެން ކުރިއަށް ދިއުމަށެވެ.
އިންޓަރިމް ކައުންސިލްގެ އަޣުލަބިއްޔަތުން މުޙައްމަދު ޝިފާޒް (ޝިއްޕެ)ގެ ޤަރާރު ފާސްވުމުން އިތުރު ހުށަހެޅުމެއް ހުށަހެޅުމުގެ މާނައެއް ނެތްކަމަށް ކަނޑައަޅައި ރިޔާސަތުން ބައްދަލުވުން ނިމުނީކަމަށް އިޢުލާން ކުރެއްވިއެވެ. މާދަމާ އަކީ 20 ސެޕްޓެމްބަރު ކަމުން ދެ ޕާޓީއަށް ވެސް ދީފައި އޮތް ސުންގަޑި މާދަމާގެ ނިޔަލަށް ހަމަވާނެއެވެ.
