ކުއްލިގޮތަކަށް ފަތުރުވެރިކަމާބެހޭ ވަޒީރުކަމުން އިބްރާހީމް ފައިސަލް ވަކިކުރެއްވުމުން ލިބިވަޑައިގަތް ކުއްލި ހައިރާންކަމުގައި ހިތްހަމަނުޖެހުން ފައުޅުކުރެއްވި ނަމަވެސް، އެމަނިކުފާނަށް ހަމަވިސްނުން އައުމުން ރައީސް ޑރ. މުޙައްމަދު މުޢިއްޒަށް ތަޢުރީފުކުރައްވައި ޝުކުރު އަދާކުރައްވައިފިއެވެ.

ވަޒީރުކަމުން ވަކިކުރެއްވި ހިނދު އެމަނިކުފާނު ފުރަތަމަ ވިދާޅުވީ އެވަގުތުން ފެށިގެން ސަރުކާރަށް ކުރެއްވި ތާޢީދު އަނބުރާ ގެންނެވި ކަމަށާއި، އެވަގުތުން ފެށިގެން ހުންނެވީ ސަރުކާރާ އެކުގައި ނޫންކަމަށެވެ. އަދި ކުރީގެ ރައީސް މުޙައްމަދު ނަޝީދުގެ ބަސްފުޅެއް ފަށްފަށް ކުރައްވައި ވިދާޅުވީ ކާމިޔާބީގައި ހިތްތިރިކުރައްވައި ނާކާމިޔާބީގައި ހިތްވަރު ގަދަކުރައްވާނެ ކަމަށެވެ.

އެހެން ނަމަވެސް ފައިސަލްއަށް ވިސްނިވަޑައިގަތީ ފަހުންނެވެ. އެމަނިކުފާނުގެ ބައްޕާފުޅުގެ ސިޔާސީ ކުރިމަގު އޮތީ މަރުގެ ތުންފަތްމަތީގައިކަން އެނގިވަޑައިގަތުމުން ހިތްތިރިކުރައްވައި ދެއްވި ފުރުޞަތަށްޓަކައި ވަނީ ރައީސަށް ޝުކުރު އަދާކުރައްވާފައެވެ. އަދި ފައިސަލްގެ އެ ނިންމެވުމަށް ގިނަ ބައެއްގެ ތަޢުރީފު ދަނީ ލިބެމުންނެވެ.