ކަރުދާސްކޮޅެއް ސްކޭން ކުރުމުގެ އަގު އިންތިހާއަށް ބޮޑުވެއްޖެއެވެ. ޢާންމު ރައްޔިތަކު ސޯޝަލް މީޑިޔާގައި ހިއްސާކޮށްފައިވާ ތަޖުރިބާގައި ބުނެފައިވާ ގޮތުން، މާލޭ ސަރަޙައްދުގައި ފޮޓޯ ކޮޕީ ނަގާ ތަންތަނުން އެފޯ ސައިޒުގެ ސަފުހާއެއް ސްކޭންކޮށް ވައިބާ ކޮށްދިނުމަށް 19 ރުފިޔާ ނަގަމުން އެބަދެއެވެ. ސްކޭން ކުރުމަށް 4 ރުފިޔާއެވެ. އަދި ވައިބާ ކޮށްދިނުމަށް 15 ރުފިޔާއެވެ. އެމީހާ ބުނެފައިވާގޮތުން، އެ އަގުގައި އެތަނުން އެޚިދުމަތް ނުހޯދައި މާލޭގެ އަމީނީމަގުގައި ހުންނަ މަޝްހޫރު ފޮޓީ ކޮޕީ ނަގާ ތަނަކަށް އެ ޚިދުމަތް ހޯދަން ދިޔުމުން ބުނީ ސްކޭން ކުރުމަށް 2 ރުފިޔާ ނަގާ ކަމަށާއި ވައިބާ ކޮށްދިނުމަށް އިތުރު 5 ރުފިޔާގެ ފީއެއް ނަގާނެ ކަމަށެވެ.
ސަރުކާރުގެ ބައެއް ޚިދުމަތްތައް ހޯދުމަށާއި އަމިއްލަ ބޭނުންތަކުގައި ވަރަށް ގިނަފަހަރަށް އާންމު ރައްޔިތުންނަށް ބައެއް ބާވަތުގެ ލިޔެކިޔުންތައް ސްކޭންކުރުމާއި އެޓެސްޓުކުރުން ފަދަ ކަންކަން އާންމު ގޮތެއްގައި ކުރަންޖެހެއެވެ. މިޒަމާނުގައި ޑޮކިއުމަންޓެއް ސްކޭން ކޮށްލުމަކީ އަތުގައި އޮންނަ ސުމާޓު ފޯނުންވެސް ފަސޭހައިން ކުރެވޭ ކަމެކެވެ. ނަމަވެސް، ކޮންމެ މީހަކަށް އެފަދަ ކަންކަން ޕްރޮފެޝަނަލް މިންގަނޑުން ކުރަން ނޭނގުމުގެ ސަބަބުން ވަރަށް ގިނަފަހަރަށް ފޮޓޯ ކޮޕީ ނަގާ ތަންތަނުން އެ ޚިދުމަތް ހޯދަންޖެހެއެވެ.
ސޯޝަލް މީޑިޔާގައި ކަންބޮޑުވުންތައް ފާޅުކުރިމީހާ ތުހުމަތުކުރާ ގޮތުން، ސްކޭންކޮށް ވައިބާކޮށްދިނުމުގެ އަގުތައް އިންތިހާއަށް އުފުލިފައިވަނީ އެތަންތަނުގައި ޚިދުމަތްދޭން ބޭރުމީހުން ތިބުމުގެ ސަބަބުންނެވެ. އެމީހާ އިތުރަށް ހާމަކޮށްފައިވާ ގޮތުން، މާލޭގެ ހެންވޭރުކޮޅުގައި ހުންނަ ފޮޓީ ކޮޕީނެގުމުގެ ޚިދުމަތްދޭތާ ގިނަދުވަސްވީ އަދި މަޝްހޫރު ފޮޓީކޮޕީ ނަގާ ތަނަކުން އަދިވެސް 3 ރުފިޔާއަށް ސަފުހާއެއް ސްކޭންކޮށް، ވައިބާ ކޮށްދެއެވެ.
