ރޯދަމަހަކީ ސަވާބާއި ދަރުމައިން ފުރިގެންވާ މާތް މަތިވެރި މައްސަރެކެވެ. ރަމަޟާން މަހުގައި އެއްހާސް މައްސަރަށްވުރެ ހެޔޮކަން ބޮޑު ރެއެއްވެއެވެ. އެއީ އަމާންކަމާއި ސަލާމަތްކަން ލިބިގެންވާ ލައިލަތުލް ޤަދުރިވިލޭރެއެވެ. ގުރުއާން ބާވާލެއްވީ ލައިލަތުލް ޤަދުރިވިލޭރޭގައެވެ. މި މާތް މައްސަރުގެ ދަރުމަޔާއި ސަވާބު ހޯދުމަށްޓަކައި ކޮންމެ މުސްލިމަކު ވެސް ގަދައަޅާ މަސައްކަތް ކުރުމަކީ ވަރަށް މުހިންމު ކަމެކެވެ. އެހެންކަމުން، ރޯދަ މަހުގެ ސަވާބާއި ދަރުމަ ހޯދުމަށްޓަކައި ޢަމަލުތައް ބައްޓަންކުރެވިދާނެ ގޮތުގެ މުހިންމު ބައެއް އިރުޝާދުތައް ހިއްސާކޮށްލާނަމެވެ.
ރޯދަމަހުގެ ސަވާބާއި ދަރުމަޔަށް އެދޭ މީހަކު އެންމެ ފުރަތަމަ ވެސް ފަރުޟު ފަސް ނަމާދަށް ރައްކާތެރިވާށެވެ. އެގޮތުން، ނަމާދު އޭގެ ވަގުތުގައި އަދާކުރާށެވެ. ފިރިހެނުން މިސްކިތުގެ ޖަމާޢަތުގައި ބައިވެރިވެ ނަމާދު ޤާއިމުކުރާށެވެ. ނަމާދުގެ ވަގުތުގެ ކުރީކޮޅު ގޭގައި ކަނބަލުން ނަމާދު އަދާކުރާށެވެ. އަދި ދެއްކުންތެރިކަމުގެ ގޮތުން ނަމާދުނުކުރާށެވެ. މީގެ އިތުރުން، ސުންނަތް ނަމާދުތައް ވެސް ގިނަގިނަ ކުރުމަށް ސަމާލުކަންދޭށެވެ. އޭރުން، ސަވާބާއި ދަރުމަ އެމީހަކަށް އިތުރުވެގެންދާނެއެވެ.
ރޯދަމަހުގެ ސަވާބާއި ދަރުމަ ހޯދުމަށްޓަކައި ވީހާވެސް ގިނައިން، ގުރުއާން ކިޔެވުން އިތުރުކުރާށެވެ. ރަމަޟާން މަހަކީ ގުރުއާން ބާވާލެއްވުނު މަތިވެރި މާތް މައްސަރަށްވީތީ، މި މަހުގައި ގުރުއާން ކިޔެވުމަށް ގިނަ ވަގުތު ހޭދަކުރުމަށް ސަމާލުވާށެވެ. މީގެ އިތުރުން، ގުރުއާން ކިޔެވުމުގައި މަޑުމައިތިރިކަމާއެކު ލަސްލަހުން ކިޔަވާށެވެ. އަދި ގުރުއާން ކިޔަވާއިރު ތަޖުވީދުގެ ހަމަތަކާއި އެއްގޮތަށް ކިޔަވަން މަސައްކަތް ކުރާށެވެ. މީގެ އިތުރުން، ގުރުއާން ހިތުދަސްކުރަން މަސައްކަތްކުރާށެވެ. ކިޔަވަމުން ދާއިރު އާޔަތްތަކުގެ މާނަޔަށް ވިސްނައިގެން ކިޔަވާށެވެ. އޭރުން، ގުރުއާން ކިޔެވުމުގެ ސަބަބުން އެތަށް ދަރުމަޔަކާއި ސަވާބެއް އެމީހަކަށް ލިބިގެން ދާނެއެވެ.
ރޯދަމަހުގެ ސަވާބާއި ދަރުމަ ހޯދުމަށްޓަކައި އެމީހަކަށް ކުޅަދާނަވީ މިންވަރަކުން ޞަދަޤާތް ކުރާށެވެ. ޞަދަޤާތް ކުރުމުގައި ނިޔަތް ރަނގަޅުކުރާށެވެ. އެގޮތުން، ދެއްކުންތެރިކަމުގެ ގޮތުން ޞަދަޤާތް ނުކުރާށެވެ. މީގެ އިތުރުން، އެހެން މީހުންގެ އެހީއަށް އެންމެ ބޮޑަށް ބޭނުން ޖެހިފައިވާ ނިކަމެތި ފަގީރުންނަށް އިސްކަންދޭށެވެ. މިގޮތަށް، ކޮންމެ ދުވަހަކު ޞަދަޤާތް ކުރެވިއްޖެނަމަ މާތް ﷲ ގެ ތަނަވަސް ރަހުމަތުން އެމީހެއްގެ ހެޔޮކަމުގެ ތިލަފަތް ބަރުވެގެންދާނެއެވެ.
ރޯދަމަހުގެ ސަވާބާއި ދަރުމަ ހޯދުމަށްޓަކައި މާތް ﷲ އެންގެވި އަޅުކަންތައްތަކުގައި ދެމިތިބޭށޭވެ. އެގޮތުން، ނަމާދު ގާޢިމް ކުރުމާއި ގުރުއާން ކިޔެވުމާއި އަދި ޞަދަޤާތް ދިނުން ފަދަ އަޅުކަންތައްތަކުގައި ދެމިތިބޭށޭވެ. މި އިރުޝާދުތަކާއި އެއްގޮތަށް ޢަމަލުކުރާށެވެ. ނަތީޖާއަކަށް ވެގެންދާނީ، އެމީހަކަށް ރޯދަމަހުގެ ދަރުމަޔާއި ސަވާބު ފުރިހަމަޔަށް ލިބިގެން ދިއުމެވެ.
