މިލައުތުރު ހޭންޑްބޯޅަ މުބާރާތުގައި ވާދަކުރާ ފޯކައިދޫ ހޭންޑްބޯޅަ ޓީމުގައި ބޭނުންކުރުމުގެ ނަމުގައި ރާއްޖެއިން ބޭރުން އެތައް ހާސް ރުފިޔާއެއްގެ މުދާ އެތެރެކުރީ ކައުންސިލްގެ ރައީސް އަޙްމަދު އާސިފްގެ މަޞްލަޙަތު އޮންނަ ވިޔަފާރިއަކުން ކަމަށް ބުނާ ކޮރަޕްޝަންގެ ތުހުމަތުތަކެއް ފެންމަތި ވެއްޖެއެވެ.
މިލައުތުރަށް މަޢުލޫމާތު ލިބިފައިވާގޮތުގައި މުޅި މުބާރާތަައްް ވެސް ބޭނުންނުވާނެހާ ގިނަ ސާމާނު ފޯކައިދޫ ހޭންޑްބޯޅަ ޓީމުގެ ބޭނުމަށް ގެނެސްފައިވާ ކަމަށާއި، އެތަކެތި ވެންޑަރ ކުރުމުގައި ޤާނޫނާ ޤަވައިދާ ޚިލާފަށް ޢަމަލުކޮށްފައި ވާކަމަށެވެ. އަދި ނަން ހާމަނުކުރުމަށް ޝަރުޠުކޮށް މަޢުލޫމާތު ޙިއްސާކުރި ފަރާތަކުން ބުނިގޮތުގައި އެތަކެތި މިހާރު ވަނީ ފޯކައިދޫއަށް ގެންގޮސްފައެވެ. އަދި އެތަކެތީގެ ޖުމްލަ އަގު ލައްކައިން މައްޗަށް އަރާނެކަމަށް އަންދާޒާކުރެވޭކަމަށެވެ.
އަދި އިތުރަށް މަޢުލޫމާތު ލިބިފައިވާގޮތުގައި ރައީސް އާސިފްގެ މަޞްލަަޙަތު އޮންނަ ވިޔަފާރިއަކުން އެތަކެތި އެތެރެކޮށްފައި، ކައުންސިލަށް ބިލްކުރަނީ ރަށުގެ އެހެން ކުންފުންޏެއްގެ ނަމުގައި ކަމަށާއި، އެއީ ޢާންމުކޮށް ވެސް އެމީހުން ކޮރަޕްޝަންގެ ޢަމަލުތައް ހިންގާ ގޮތްކަމަށާއި، މި މައްސަލަ އޭސީސީއަށް ހުށަހަޅަން ތަންޔާރުވެފައި ވާކަމަށެވެ.
