ރައްޔިތުންގެ މަޖިލީހުގެ މެންބަރުން އިންތިޚާބުވުމަށް ފަހު، ސިޔާސީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ، މަޖިލީހުގެ މެންބަރުކަން ގެއްލޭގޮތަށް ޤާނޫނު އަސާސީއަށް ގެނައި އިސްލާޙު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތަސްދީޤު ކުރައްވައިފިއެވެ.
ސަރުކާރުގެ ފަރާތުން ހުޅުދޫ ދާއިރާގެ ޕީއެންސީގެ މެންބަރު މުހައްމަދު ޝާހިދު ގާނޫނުއަސާސީ އަށް ހުށަހެޅުއްވި އެ އިސްލާހުގެ ފުރަތަމަ ކިޔުން މަޖިލީހުގައި އިއްވީ މިއަދެވެ. އެ ބިލްގެ ބަހުސް ފަށައި ގަޑިއެއްހާއިރު ތެރޭގައި ބަހުސްކޮށް ނިންމާލައި މުޅި މަޖިލީހުގެ ކޮމިޓީ އަށް ފޮނުވިއެވެ.
ބިލާ މެދު އިދިކޮޅު އެމްޑީޕީގެ އިތުރުން ޕީއެންސީގެ ބައެއް މެންބަރުން ވެސް ޚިޔާލު ތަފާތުވީ ނަމަވެސް ކޮމިޓީ މަރުޙަލާ އަވަސް އަވަހަށް ނިންމާލުމަށް ފަހު، އެންޓި ޑިފެކްޝަނާ ގުޅޭ މާއްދާތަކަށް އެއްވެސް ބަދަލެއް ނުގެނެސް ވަނީ ފާސްކޮށްފައެވެ.
ކޮމިޓީން ނިންމިގޮތާ މެދު ގޮތެއް ނިންމުމަށް މިއަދު ހަވީރު ބޭއްވި މަޖިލީހުގެ ޖަލްސާގައި ނެެގި ވޯޓުގައި 78 މެންބަރުން ވޯޓު ދެއްވީ ފެންނަކަމަށެވެ. ނުފެންނަ ކަމަށް ވޯޓު ދެއްވީ އެންމެ 13 މެންބަރުންނެވެ. ޖަލްސާގައި ވަޑައިގެންނެވި ޕީއެންސީގެ ހުރިހާ މެމްބަރުން ވެސް ވޯޓު ދެއްވީ ގާނޫނުއަސާސީއަށް އިސްލާޙު ގެންނަން ފެންނަކަމަށެވެ.
