މިފަހަކަށް އައިސް ރާއްޖޭގައި އެންމެ ހަރަކާތްތެރި އެއް ކައުންސިލްކަމަށް މަޝްހޫރުވެފައިވާ ށ. ފޯކައިދޫ ކައުންސިލްގެ އިދާރީ އޮފީހުގެ ތެރޭގައި ބޮޑު ޒުވާބެއް ހިނގައިފިއެވެ.
މި ޒުވާބު ހިނގާފައި ވަނީ ކައުންސިލް މެމްބަރ ޙުސައިން ފަރީދުއާ ކައުންސިލްގެ ރައީސް އަޙްމަދު އާސިފް އާއި ދެމެދުގައެވެ. މެންބަރު ޙުސައިން ފަރީދު ބާކީކޮށް، އެކަހެރިކޮށް، ތަފާތުކުރާތީ ހިތްހަމަނުޖެހިގެން ކައުންސިލް ތެރޭގައި އެވާހަކަތައް ދައްކަން ފެށުމުން ކައުންސިލްގެ ރައީސްގެ އިތުރުން އިދާރީ މުވައްޒަފުން ވެސް ނިކުތީ ފަރީދުއާ ދެކޮޅަށެވެ.
ހަސަން ކުރުސީގެ ދަރިވަރެއް ކަމަށް ބެލެވޭ ފޯކައިދޫ ކުރުސީ ފޭސްބުކްގައި ޙިއްސާކުރެއްވިި ވީޑިއޯއިން ފެންނަނީ ކައުންސިލް މެމްބަރ ޙުސައިން ފަރީދު އާއި އިދާރީ އެހެން މުވައްޒަފަކާ ދެމެދު ހޫނު ޒުވާބެއް ހިނގާ މަންޒަރެެވެ. އަދި، އެ ޒުވާބުގެ ތެރޭގައި ކައުންސިލްގެ ރައީސް ވާހަކަދައްކަވާ އަޑު ވެސް އިވެއެވެ.
ކައުންސިލް މެމްބަރ ޙުސައިން ފަރީދަކީ އެމްޑީޕީ ޓިކެޓުގައި އިންތިޚާބު ވުމަށް ފަހު، މިހާރު ވެރިކަންކުރާ ޕީއެންސީއާ އެކު މަސައްކަތްކުރައްވާ މެމްބަރެކެވެ. އޭނާގެ ޝަކުވާއަކީ އެއްވެސް ކަމެއްގައި ބައިވެރި ނުކުރުވުމާއި، މަޝްވަރާ ނުކުރުމާއި، ބާކީކޮށް އެކަހެރި ކުރާކަމުގެ ޝަކުވާއެވެ.
ޒުވާބުގެ ތެރޭގައި ކައުންސިލަށް ބޮޑެތި ތުހުމަތުތަކެއް ކޮށް ފަރީދު ބުނެފައި ވަނީ ސަބުމެރީން ވެސް ކައިފިކަމަށާއި، އެހެންވެސް މަންފާތައް ނަގައިފިކަަމަށާއި، އެހެން އެއްވެސް ކަމެއް ޙަވާލުނުކޮށް ބާކީކޮށްލުމުން ވައިވެސްވިކަމަށާއި، ދެރަވެގެން ލޮލުން ކަރުނަވެސް އެޅިކަމަށެވެ.
