ދިވެހީން މާޒީކުރި ވެރިކަންތަކުގައި ކުރި ފަދައިން ރައީސުލްޖުމްހޫރިއްޔާގެ ފޮޓޯކޮޅު އަނެއްކާވެސް ސަރުކާރުގެ އޮފީސްތަކުގައި ބަހައްޓަން ފަށައިފިއެވެ. އެކަން އެންމެ އާންމުވެފައި ވަނީ ރައީސް މައުމޫންގެ ރަން ތިރީސް އަހަރުގެ ވެރިކަމުގައެވެ. އެއީ ތަހުޒީބު މުޖުތަމަޢުތަކުގައި މިހާރު އެއްވެސް ތަރުޙީބެއް ލިބޭ ކަންކަމެއް ނޫނެވެ.
ރައީސް މައުމޫންގެ ވެރިކަން 2008 ވަނަ އަހަރު ވެއްޓުމާއެކު އޭގެ ފަހުން އައި އެއްވެސް ވެރިކަމެއްގައި ރައީސުލްޖުމްހޫރިއްޔާގެ ފޮޓޯކޮޅު ބެހެއްޓުމެއް ނުގެންގުޅުއްވައެވެ. އެހެން ނަމަވެސް މިހާރު އަނެއްކާވެސް ރައީސްގެ ފޮޓޯކޮޅު ބެހެއްޓުމުގެ އާދަ އަލުން ރުޖޫއަވާން ފަށައިފިއެވެ. މިއީ ކޮންފަދަ ބަދަލެއްގެ ފެށުން ބާވައެވެ. ބައެއް މީހުން ސިފަކުރާ ގޮތުގައި އެއީ ޚުދުމުޚުތާރު ވެރިކަމެއްގައި މެނޫނީ ފެންނާނެ ކަމެއް ނޫނެވެ.
ސޯޝަލް މީޑިޔާގައި ދައުރުވަމުންދާ ޕޮޓޯއަކުން ފެންނަނީ ރައީސް ޑރ. މުޢިއްޒުގެ ފޮޓޯކޮޅުތައް ފުރޭމަށް ލާފައި ސަރުކާރުގެ ވުޒާރާއެއްގައި ބަހައްޓަފައި ހުންނަ މަންޒަރެވެ. އެ ފޮޓޯއަށް ބޮޑު ސަމާލުކަމެއް ލިބިފައި ވަނީ އެއީ މީގެ އެތަކެއް އަހަރެއްގެ ކުރިން ދިވެހީން މާޒީކޮށްފައިވާ ކަމަކަށް ވާތީއެވެ. އަދި މީހުންގެ އެންމެ ބޮޑު ކަންބޮޑުވުމެއް އޮތީ މިހާރުގެ ސަރުކާރު ޚުދުމުޚުތާރު ކަމަކަށް މިސްރާބު ޖަހާފައި ވާތީއެވެ.
