ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅާ އެއްގޮތަށް ށ. މިލަންދޫގައި ތަރައްޤީކުުރުމަށް ހަމަޖެހިފައިވާ ޑޮމެސްޓިކް އެއާޕޯޓު ރަށުގެ މޫނުމަތި ފަރާތުގެ ފަޅު ނުހިއްކާ އެޅޭނެކަމަށް ސާވޭ ޓީމުން ވެސް ބުނެފައިވާ ކަަމަށާއި، ފުއްޓަރު ފަރާތުގައި އެޅުމަކީ އެންމެ ފައިދާ ބޮޑު ގޮތްކަމަށް ގޮވާލާ ލޮބީކުރަން ފަށައިފިއެވެ.
ސޯޝަލް މީޑިޔާގައި އެކަމަށް ވަކާލާތުކުރާ ބައެއް މީހުން ބުނެފައިވާ ގޮތުގައި މިލަންދޫގެ ބިމުން ބަޔަކާއި ކޮންމެވެސް ވަރަކަށް ފުއްޓަރު ފަރާތުން ހިއްކާ ބިމާއެކު އެއާޕޯޓް ތަރައްޤީ ކުރެވިދާނެ ކަމަށެވެ. ކަމާބެހޭ ވުޒާރާގެ ސާވޭ ޓީމުން ފާހަގަކޮށްފައިވާ ގޮތުގައި އެތަނުގައި އެއާޕޯޓް އަޅާނަމަ ފެނަކަ އިންޖީނުގެ އެހެންތަނަކަށް ބަދަލުކުރަންޖެހޭނެއެވެ. މިލަންދޫ އަކީ މިހާރުވެސް އައު އިންޖީނުގެއެއް އަޅަންޖެހިފައިވާ ރަށަކަށް ވީހިނދު، އިންޖީނުގެ ބަދަލުކުރުމަކީ އުނދަގޫ ކަމަކަށް ނުވާނެ ކަމަށެވެ.
އަދި ފުއްޓަރު ފަރާތުގައި އެއާޕޯޓް ތަރައްޤީކުުރުމުން މީހުން ދިރިއުޅޭ އެއްވެސް ގެެއެއް ބަދަލުކުރާކަށް ނުޖެހޭނެކަމަށާއި، ރަށުގެ ދެކުނުކޮޅުގައި ޓާމިނަލް ހަދަން ނިންމާފައިވާ ސަރަޙައްދު ދިމާވަނީ މިހާރުވެސް ހުސްކޮށް އޮތް އަދި މުސްތަޤުބަލުގައި ޓާމިނަލް ބޮޑުކުރާނެ ޖާގަ ވެސް ލިބޭ ކަމަށެވެ. އަދި އެއީ ހިއްކަންޖެހޭ ސަރަހައްދު ކުޑަ، ޚަރަދު ވެސް ކުޑަކޮށް އަވަހަށް އެއާޕޯޓް ތަރައްޤީކުރެވޭނެ ގޮތެއް ކަމަށެވެ. އަދި ކައުންސިލުން އެގޮތަށް ބާރުއެޅުމަށް ގޮވާލާ ކަމަށެވެ.
