އެފްއެސްއެމްގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، އޭގެން ލިބޭ ފައިސާ ލޯންޑާކުރަމުން ދާ ކަމަށް ޝައްކު ކުރެވޭ މައްސަލައެއް ފުލުހުން ތަހުގީގުކުރަމުންދާ ކަމަށް ހޯމް މިނިސްޓަރ އަލީ އިހުސާން އެކްސްގައި ވިދާޅުވެއްޖެއެވެ.

ފުލުހުންގެ ޚާއްސަ ޓީމަކުން މިހާތަނަށް 10 މީހުންނާ ދެ ގެއަކާއި، ތެޔޮ އުފުލާ ދެ ބާޖެއް ބަލައި ފާސްކޮށް، މައްސަލައާ ގުޅުންހުރި އާލާތްތަކާއި ކިތާބީ ހެކި ވެސް ހޯދާފައިވާ ކަމަށް އިހުސާން ވިދާޅުވެފައި ވެއެވެ. އަދި ތަހުގީގު ކުރިއަށް ދާ ވަރަކުން އިތުރު ތަފްސީލު ހާމަކުރައްވާނެ ކަމަށެވެ.

މިއަހަރުގެ ޖެނުއަރީ މަހުގެ ތެރޭގައި ވެސް މިފަދަ ކަމެއް ހިނގާފައި ވެއެވެ. އެމްޕީއެލްއަށް ޑެލިވަރީ ނުކުރާ ތެޔޮތަކެއް އެމްޕީއެލްއަށް ލިބިފައިވާ ކަމަށް ބަޔާންކޮށް، 119 ޑެލިވަރީ އޯޑާއަކަށް އެމްޕީއެލްއިން އެފްއެސްއެމްއަށް ފައިސާ ދޫކޮށް އެ ފައިސާއަށް ހިޔާނާތްތެރިވެފައިވާ ކަމަށް ތުހުމަތުކުރެވޭ މައްސަލައެއް ފެންމަތިވެފައި ވެއެވެ. އެއީ ވެސް ޖުމްލަ 6.7 މިލިއަން ރުފިޔާގެ ބޮޑު ޚިޔާނާތެކެވެ.

އެފްއެސްއެމަކީ ކުރިންވެސް އެފަދަ އެފަދަ ބޮޑެތި މައްސަލަތައް ފެންމަތިވެ ތަޙްޤީޤުކޮށްފައިވާ ކުންފުންޏެކެވެ.

ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ވެރިކަމުގައި ވެސް ފިއުލް ސަޕްލައި މޯލްޑިވްސް (އެފްއެސްއެމް) ގެ މެނޭޖިންގ ޑިރެކްޓަރުކަމުގެ މަޤާމުގައި އޭރު ހުންނެވި ޙުސެއިން ދީދީ، ކުންފުނީގެ ބޯޑަށް ވެސް ސިއްރުން 41 މިލިއަން ރުފިޔާގެ ތެޔޮ، އެކި އެކި ކުންފުނިތަކަކަށް ދޫކޮށްފައި ހުރި މައްސަލައެއްގައި ވަނީ ވަޒީފާއިން ވަކިކޮށްފައެވެ.

ސަރުކާރުގެ ތެޔޮ ކުންފުންޏަކީ އެފަދަ ޒަމާންވީ ތާރީޚެއް އޮތް ޚިޔާނާތާއި ވައްކަމުގެ ހުތުރު ނަން ލިބިފައި އޮތް ކުންފުންޏެކެވެ. ވަކި ސަރުކާރެއްގައެއް ނޫނެވެ. ކޮންމެ ސަރުކާރެއްގައި ވެސް އެތަނަށް ވެރިންގެ ގޮތުގައި އައްޔަނުކުރަނީ ބޮޑެތި ވަގުންކަމުގައި މީހުން ތުހުމަތު ކުރެއެވެ.