ޖަޕާނުގެ ކުރީގެ ބޮކްސިންގ ކުޅުންތެރިޔާ އިވާއޯ ހަކަމަޑާ ޖަލަަށްލާފައިވަނީ 1966 ގައެވެ. އޭނާ ޖަލަށް ލާފައިވަނީ އޭނާ ވަޒީފާ އަދާކުރިތަނުގެ ވެރިޔާ އާއި އާއިލާގެ އިތުރު ބަޔަކު މަރާލިކަމުގެ ކުށް ސާބިތުވެގެންނެވެ. ނަމަވެސް ޤާތިލުނޫންކަން އެނގުމުން އޭނާ މިނިވަންވެއްޖެއެވެ.

އޭނާ ޖަލަށް ލީތާ 46 އަހަރު ފަހުން އެއީ ޤާތިލުނޫންކަން އެނގުމުން ހުކުމް ބާތިލުކޮށް އޭނާ މިހާރު ވަނީ މިނިވަންކޮށްފައެވެ. މިނިވަންކުރި އިރު އޭނާގެ އުމުރަކީ 89 އަހަރެވެ. އަދި އޭނާއަށް ލިބުނު ގެއްލުމުގެ ބަދަލެއްގެ ގޮތުން 217 މިލިޔަން ޔުއާން (1.44 މިލިޔަން ޑޮލަރު) ދިނުމަށް ވެސް ވަނީ އަމުރުކޮށްފައެވެ. އޭނާ ޖަލުގައި ހޭދަކުރި ކޮންމެ ދުވަހަކަށް 12،500 ޔުއާން (83 ޑޮލަރު) ގެ ރޭޓުން ބަދަލު ނަގައިދީފައި ވެއެވެ. އޭނާގެ ފަރާތުން ވަކާލާތުކުރި ޤާނޫނީ ވަކީލުން ބުނީ، އޭނާއަށް ލިބިފައިވާ ގެއްލުމަށް ބަލާއިރު، ލިބުނު މާލީ ބަދަލަކީ އެއްވެސް އެއްޗެއް ނޫންކަމަށާއި، އޭނާގެ މުޅި ޙަޔާތް ބަރުބާދުވެފައިވާ ކަމަށެވެ. އަދި އެހާ ގިނަ އަހަރުތަކެއް ކުޑަ ގޮޅީގައި އެކަނިމާ އެކަނި ހޭދަކުރަން ޖެހުމުގެ ސަބަބުން ލިބިފައިވާ ނަފުސާނީ ގެއްލުން އަންދާޒާކުރަން ވެސް ނޭނގޭނެ ކަމަށެވެ.

މިއީ ޖިނާއީ ކުށެއްގެ އަދަބު ދެވުނު މީހަކަށް ގެއްލުމުގެ ބަދަލުގެ ގޮތުގައި ޖަޕާނުގެ ކޯޓަކުން ނަގައިދިނުމަށް މިހާތަނަށް އަމުރުކުރި އެންމެ ބޮޑު އަދަދެވެ. މީގެ ކުރިން ދުވަހަކުވެސް މިހާ ބޮޑު ފައިސާގެ އަދަދެއް ގެއްލުމުގެ ބަދަލެއްގެ ގޮތުގައި ނަގައިދީފައެއް ނުވެއެވެ. ހަކަމަޑާގެ ކުށެއް ނެތްކަމަށާއި، އޭނާގެ މައުސޫމްކަން ސާބިތުކޮށްދިނުމަށްޓަކައި އޭނާގެ ކޮއްކޮމެންނާއި އާއިލާގެ މެންބަރުން ލޮބީކުރުމުގައި ދެމިތިބުމުގެ ނަތީޖާއެއްގެ ގޮތުން އެ މައްސަލަ އަލުން ބަލަންޖެހި ޙަޤީޤަތް ހާމަވެގެން ދިޔައީ އެވެ.

މައްސަލައިގެ ތުހުމަތަށް އޭނާ ހައްޔަރުކޮށް ތަޙުޤީޤުކުރުމުގެ ތެރޭގައި ފުލުހުން ވަނީ އޭނާ ކުށަށް އިޢުތިރާފު ކުރުވާފައެވެ. އެހެން ނަމަވެސް ޝަރީއަތުގެ މަރުޙަލާގައި، ބުނެފައިވަނީ އެއްބަސްވީ ބަންދުގެ 20 ދުވަހުގެ ތެރޭގައި ލިބުނު އަނިޔާތަކަށް ކެތްނުކުރެވިގެން ކަމަށެވެ. އަދި ފަހުން އެނގިފައިވާ ގޮތުގައި ތަޙުޤީޤު ވަނީ ބައެއްގެ ނުފޫޒުން މުޅިން ބަދަލުކޮށް ހަކަމަޑާގެ މައްޗަށް ފުރޮޅާލާފައެވެ.