މިއަހަރުގެ ފިޠުރު ޢީދު ދުވަހަކީ މާރިޗު 30 ވާ އާދީއްތަ ދުވަހަށް ވާނެ ކަމަށް ވަރަށް ބޮޑަށް ޔަޤީން ކުރެވޭ ކަމަށް ކުރީގެ ރައީސް ޢަލްއުސްތާޛު މައުމޫން ޢަބްދުލްޤައްޔޫމް ވިދާޅުވުމުން ރާއްޖޭގެ ގިނަ ބަޔަކު ތިބީ އެގޮޮތަށް ބަލައިގެން ޢީދަށް ތައްޔާރު ވެގެންނެވެ.

އެމަނިކުފާނު ވަނީ ”އީދު ހަނދު“ މި ނަމުގައި ”ވޮއިސް“ އަށް ޚާއްސަ އާޓިކަލްއެއް ވެސް ކިޔުއްވާފައެވެ. އެ ލިޔުމުގައިވާ ގޮތުން ސަޢޫދީ ޢަރަބިއްޔާ އާއި، މިޞުރާއި، ތުރުކީ އާއި، މޮރޮކޯ ފަދަ އިސްލާމީ ޤައުމުތަކަށް މާރިޗު މަހުގެ 29 ދުވަހު އިރުއޮއްސުމަށްފަހު، ހަނދު ނޯއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެކަމަށް ފަލަކީ ހިސާބުން ދައްކާ ކަމަށެވެ. އެހެންކަމުން ޖެހިގެން އަންނަ މާރިޗު 30 ވާ އާދީއްތަ ދުވަހަކީ މިއަހަރުގެ ފިޠުރު ޢީދު ދުވަހަށް ވާނެ ކަމަށް ވަރަށް ބޮޑަށް ޔަޤީން ކުރެއްވޭ ކަމަށެވެ.

ރާއްޖޭގެ ގިނަ ބަޔަކު ދެކޭގޮތުގައި ރައީސް މައުމޫނަކީ ދިވެހިރާއްޖޭގައި ހުންނެވި އެންމެ ބޮޑު ފަލަކީ ޢިލްމުވެރިޔާއެވެ. އެހެންކަމުން އެމަނިކުފާނު ޖައްސަވާ ފަލަކީ ހިސާބަކީ ވަރަށް މުޖައްރިބު އެއްޗެކެވެ.