ރަމަޟާން މަހުގެ ކުރިން އައްޑޫގެ ކަރަންޓުގެ މައްސަލަ ޙައްލުކޮށްދެއްވާނެ ކަމަށް ވަޢުދުވީ ނަމަވެސް، ކަރަންޓު މައްސަލައަށް ޙައްލެއް ނުލިބި އައްޑޫ ރައްޔިތުން ރޯދަމަސް ހޭދަކޮށް ނިމެނީއެވެ. މީގެ އިތުރުން ޚިދުމަތް ރަނގަޅު ކުރުމަށްޓަކައި މުޅިން އައު ޖަނަރޭޓަރެކޭ ބުނެ ފޮނުވާފައިވަނީ ވެސް ބާވެ ދަބަރުޖަހާފައިވާ ޖަނަރޭޓަރެއްކަން ފަޅާއަރައިފިއެވެ.
ސޯޝަލް މީޑިޔާގައި ދައުރުވަމުންދާ މަޢުލޫމާތުތަކަށް ބަލާއިރު، ފެނަކައިން އައްޑޫއަށް ފޮނުވާފައިވަނީ ދެ އަހަރު ދުވަހު ބޭނުންކޮށްފައިވާ ބައު ޖަނަރޭޓަރެކެވެ. ޖެންސެޓް އުފެއްދި ތާރީޚަކީ 10 ސެޕްޓެމްބަރ 2024 ވަނަ އަހަރު ކަމަށް ޖަހާފައިވީ ނަމަވެސް އަސްލު ތާރީޚަކީ އެއީ ނޫން ކަމަށެވެ. އެކަން ޔަޤީންވާ ގޮތަކީ 21 ސެޕްޓެމްބަރ 2023 ގައި އިންޑިޔާގެ ދިއްލީގެ ސިނާއީ ސަރަހައްދެއްގައި ބޭނުންކޮށްފައިވާ ކަމެވެ.
ޖަނަރޭޓަރު ގަނެފައިވަނީ ކުރިން ބުލެކްލިސްޓް ކޮށްފައިވާ އިންޑިޔާގެ ކުންފުންޏަކުން މުޅިން އައު ޖަނަރޭޓަރެއްގެ އަގުގައި ކަމަށް ތަފާތު މީޑިޔާ ސޯސްތަކުގައި ރިޕޯޓުކޮށްފައި ވެއެވެ. އެފަދަ ބައެއް ރިޕޯޓުތައް ބުނާގޮތުގައި ޖަނަރޭޓަރު ގަނެފައިވަނީ 7.8 މިލިޔަން ރުފިޔާއަށް ކަމަށާއި، އެފަދަ ބައު ޖަނަރޭޓަރު 3.5 މިލިޔަން ރުފިޔާއަށް ލިބޭ ކަމަށެވެ.
