އަންހެނުންގެ ފޫބުޑުގައި އުޅޭނަމަ، އަންހެންދުޅާ ވާނެކަމަށް ބުނެ ޝުއައިބު އަލީ ނަމަކަށް ކިޔާ މީހަކު ފެށި ބަހުސެއް ސޯޝަލް މީޑިޔާގައި ގުގުމާލިއެވެ. އަދި އެއްބަޔަކު އޭނާ އާއި ދެކޮޅަށް އަރާ ބަހުސް އިތުރަށް ވަރުގަދަ ކުރިއެވެ. ނަމަވެސް އޭނާ ހުރީ ގޮތްދޫކުރާކަށް ނޫނެވެ. އަދި ތަކުރާރުކޮށް ބުނަމުންދިޔައީ ކިތަންމެ ރުޅި އަޔަސް، ނެގި ނެގިފައި ޖެހުނަސް، ރުޅި އައިސްގެން ހުޅު ރޯވިޔަސް އެއީ ބުނަން ނުޖެހޭ ވާހަކައެއް ނޫންކަމަށެވެ.

ކިތަންމެ ވަރަށް ރުޅި އައިސްގެން އަލިފާން ރޯވިޔަސް، އަޅުގަނޑު ބުނީކީ ބުނަން ނުޖެހޭނެ ވާހަކައެއް ނޫން – ޝުއައިބު އަލީ

އަދި އަންހެންދުޅާވުން އޭނާ މާނަކުރާގޮތް ވަނީ ވަރަށް ތަފުޞީލުކޮށް ބުނެދީފައެވެ.

އަންހެންދުޅާ ވުމޭ މިބުނަކީ، އަންހެން އަޑުން ވާހަކަ ދެއްކުމާއި، އަންހެނުން ޙަރަކާތް ކުރާގޮތަށް ޙަރަކާތް ކުރުމަކަށް ނޫނެވެ. އާދަކާދާގައި އަންހެނުންނަށް ޚާއްޞަ ކަމެއް، ނުވަތަ ޢާންމުކޮށް އަންހެނުން ކުރާ ކަމެއް ކުރަން ހަދައިގެން، ފިރިހެން މީހާގެ ޒިންމާތައް މަތިން ހަނދާން ނައްތާލެވޭނަމަ، އެއީ އަންހެންދުޅާވުމެވެ. ސަބަބަކީ، އެހެން ކަންކަން ދޫކޮށް، އަންހެނުންނަށް ޚާއްޞަ ކުރެވިފައިވާ މަސައްކަތްތަކަށް، ހުސްވެ ތިބޭނީ އަންހެނުންނެވެ.

މިހާރު ފެންނަނީ ގިނަ ފިރިހެނުން ޝުއައިބުގެ ބަހަށް ތާއީދުކޮށް އެއީ ޙައްޤު ތެދުކަމަށް ބުނެ ހިތްވަރު ދެމުންދާތަނެވެ. އަދި އަނެއް ބަޔަކަށް ހުވަފެނުގައި ވެސް ޝުއައިބު ފެންނަން ފަށައިފިއެވެ. އެހެންކަމުން މިފަހަރު ޝުއައިބުގެ ”އަންހެންދުޅާ“ ބަހުސް ޙަޤީޤަތުގައި ވެސް އޭނާ ކާމިޔާބުކޮށްފިއެވެ.