އާޒިމާ ފޭސްބުކްގައި ލިޔުއްވާފައި ވަނީ ރައީސް މައުމޫނާއި ޑރ. ޙަސަން ޙަމީދާ ދެބޭފުޅުން ވިދާޅުވާކަމަށް އެކަމަނާއަށް ހީވަނީ އެއްވާހަކައެއް ކަމެވެ. ދެބޭފުޅުންވެސް ވިދާޅުވީ ރާއްޖެއަށް މިރޭ، ހަނދާއި އިރު އޮއްސޭނީ އެއްގަޑިއެއްގައި ކަމަށެވެ. ދެބޭފުޅުންވެސް ވިދާޅުވީ މިރޭ، ސަޢުދީއަށް އިރުއޮއްސޭއިރު ހަނދު ނުއޮއްސޭނޭ ކަމަށެވެ. އަދި ފެނުންމަތީގައި ހަނދު ހުންނާނޭ ކަމަށެވެ. އެހެންވީމާ ސަޢުދީއަށް 30 ވަނަ ދުވަހު ޢީދަށްވާނެ ކަމަށެވެ.

ދެބޭފުޅުންގެ ޚިޔާލުތަފާތު ވާކަމުގައިވަނީ އިސްލާމީ ޤައުމުތަކަށް ހަނދު ފެނިގެން ދިވެހިރާއްޖެއަށް ޝައްވާލުމަސް ފެށުނީކަމުގައި ކަނޑައެޅުމުގެ މައްޗަށެވެ. ރައީސް މައުމޫން ވިދާޅުވަނީ މާދަމާ ރާއްޖެއަށް ޢީދުވާނެ ކަމަށެވެ. އެއީ ސަޢޫދީ އަރަބިއްޔާއާއި އިސްލާމީ އެހެން ޤައުމުތަކަށް ހަނދުފެނި މާދަމާއަކީ ޝައްވާލުމަހުގެ ފުރަތަމަ ދުވަސްކަމުގައިވާނޭތީ ކަމުގައި ލިޔުއްވާފައިވެއެވެ. އެއީ ރާއްޖޭގައި ޢަމަލުކުރަމުން އަންނަ އުޞޫލުގެ މައްޗަށް ބިނާކުރައްވައި ވިދާޅުވި ބަހެއްކަމުގައި ޤަބޫލުކުރެވެއެވެ. އަދި މި އުޞޫލުކަނޑައެޅީ ދީނުގައި ކަންއޮތްގޮތުގެ މައްޗަށް ބައްލަވާފައިކަމުގައި، އެއިރު ސަރުކާރުންވަނީ އިޢުލާނުކުރައްވާފައެވެ. ރާއްޖޭގައި އަދި މިއުޞޫލު ބަދަލުކުރެއްވި ކަމެއް ސަރުކާރުން އިޢުލާނުކުރައްވާފައި ނުވެއެވެ.

ޑރ. ޙަސަން ޙަމީދުވިދާޅުވަނީ މުސްލިމް އެހެން ޤައުމުތަކަށް ހަނދުފެނުނަސް ރާއްޖެއަށް ޢީދުކަމުގައި ނެހެދޭނޭކަމަށެވެ. ކޮންމެ ޤައުމަކަށް ވަކިން ހަނދު ފެންނަންޖެހޭނޭ ކަމަށެވެ. އޭނާ ޙަވާލާ ދެއްވީ މެލޭޝިޔާ ފަދަ ބައެއް އިސްލާމީ ޤައުމުތަކުން މިކަމުގައި ޢަމަލުކުރާ ގޮތްކަމުގައި ވިދާޅުވެއެއެވެ.

އާޒިމާ އިތުރަށް ލިޔުއްވާފައިވަނީ، ޑރ. ޙަޞަން ޙަމީދަކީ އަޅުގަނޑުވަރަށް އިޙްތިރާމް ކުރާ ބޭފުޅެކެވެ. އެމަނިކުފާނުގެ ފަންނުގައި އޭނާ ފުންނާބު އުސްވިޔަސް، އޭނާއަކީ ދީނީ އަދި ޝަރުޢީ މައްސަލަތަކުގައި އޮތޯރިޓީއެއްކަމުގައި ނުފެންނަ ކަމަށާއި، ރައީސް މައުމޫންގެ ދީނީ ތަޤްރީރުތަކަކީ، ޢިލްމުގެ މައްޗަށް ބުރަވެ ހުންނަވާ ދެއްވާ ޢިލްމީ އަދި ފަންނީ ތަޤްރީރުތަކެއް ކަމަށެވެ. އެފެންވަރުގައި ދީނީ ތަޤްރީރުދެއްވާ އެހެން ބޭފުޅަކު ރާއްޖޭގެ ޕޯޑިއަމްއަކުން އަދި ނުފެންނަ ކަމަށެވެ.