ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓީގެ ލީޑަރު ޤާސިމް އިބްރާހީމަށް ލިބިވަޑައިގެންނެވި ބޮޑު ނާކާމިޔާބަށް ފަހު، ދެވަނަ ބުރުގައި އެއްވެސް ކެންޑިޑޭޓަކަށް ތާޢީދު ނުކުރުމަށް ނިންމެވުމާއި ގުޅިގެން އެޕާޓީގެ އިސް ބައެއް ފަރާތްތައް އެކި ޕާޓީތަކަށް ބަދަލުވާން ފަށައިފިއެވެ. އެގޮތުން އެޕާޓީގެ ކައުންސިލް މެންބަރުންގެ ތެރޭގައި ހިމެނިވަޑައިގަންނަވާ ބައެއް ފަރާތްތައް ޑރ. މުޢިއްޒަށް ތާޢީދުކުރައްވާފައި ވާއިރު، އަނެއްބައި ބޭފުޅުން ވަނީ ރައީސް ޞާލިޙަށް ތާޢީދުކުރައްވާފައެވެ. އަދި މީގެ ތެރެއިން ބައެއް ބޭފުޅުން ޖޭޕީ އިން ވަކިވެ އަނެއްބައި ބޭފުޅުން އެހެން ޕާޓީތަކަށް ސޮއިކުރައްވައިފިއެވެ.
ކައުންސިލް މެންބަރުންކަމަށްވާ ޢަލީ އާރިފް އާއި އިޤްބާލާ ދެބެން ވަނީ ޑރ. މުޢިއްޒުއަށް ތާޢީދުކުރައްވައި ޕީޕީއެމް އާއި ގުޅިވަޑައިގެންފައެވެ. ޢަލީ ވަހީދު ވަނީ ޖުމްހޫރީ ޕާޓީ އިން ވަކިވެފައެވެ. ރިޔާޒް ރަޝީދު އާއި ބޮކި ސައީދު ފަދަ ބޭފުޅުން ވަނީ އެމްޑީޕީއަށް ސޮއިކުރައްވާފައެވެ. ދެވަނަ ބުރުގެ ވޯޓުގެ ކުރިން އަންނަމުން މިދާ ބަދަލުތަކުގެ ސަބަބުން ނަތީޖާއަށް އަސަރުކުރާނެކަމަށް ފެނެއެވެ.
