މިފަހުގެ ތާރީޚެއްގައި އެންމެ މުޖައްރިބު ސިޔާސީ ހިސާބު ޖެއްސެވި އެއް ބޭފުޅަކީ މިހާރުގެ މަޖިސް ރައީސް އަބްދުއްރަހީމް އަބްދު ﷲ އޭ ދެންނެވުމީ އެއްވެސް މީހަކު ހައިރާންވާނޭ ކަމެއް ނޫނެވެ. އެ ސަބަބަށްޓަކައި “އަދުރޭ” އަކީ ރާއްޖޭގެ ސިޔާސީ މައިދާނުގައި ނުހަނު މަޤުބޫލު ޝަޚްޞިއްޔަތަކަށް ވެގެންދިޔައެވެ.

2023 ވަނަ އަހަރުގެ ރިޔާސީ އިންތިޚާބަށް ޖެއްސެވި ހިސާބު ދިމާކުރެއްވުމުން ބައެއް މީހުން އެއީ އިއްތިފާޤެއް ކަމުގައި ބުނެ އަބްދުއްރަހީމަށް ފާޑުކިޔެވެ. އެހެން ނަމަވެސް 20 ވަނަ ރައްޔިތުންގެ މަޖިލިސްގެ އިންތިޚާބުގައި ޖެއްސެވި ހިސާބު ދިމާކުރެއްވުމުން އެމަނިކުފާނަކީ ސިޔާސީ މުފައްކިރެއްގެ ގޮތުގައި މީހުން ބަލައިގެންފައި ވެއެވެ.

ދެންފެނިގެން ދިޔައީ ޕީއެންސީގައި ހުންނެވި އެންމެ ބާރުގަދަ ސިޔާސީ ލީޑަރުގެ ގޮތުގައެވެ. އެއްވެސް މީހަކަށް ފާޅުގައި ރައްދު ދެއްވަން ކެރިވަޑައިނުގަންނަވާ ރައީސް ޔާމީނަށް އެއްވެސް ޖެހިލުމެއް ނެތި ރައްދު ދެއްވާ ބޭފުޅަކީ ވެސް އެއީ ކަމުގައި ވެގެންދިޔައެވެ.

ސިޔާސީ މަޤާމުތަކަށް މީހުން ހަމަޖެއްސެވުމުގައި ވެސް އެންމެ އިސް ދައުރެެއް އަދާކުރެއްވި ބޭފުޅަކީ ވެސް އެއީ ކަމުގައި ވެގެންދިއުމުގެ ނަތީޖާއަކީ އެންމެންގެ ވެސް އެންމެ ގާތް ބޭފުޅަކީ ޚުދު އަބްދުއްރަހީމް ކަމުގައި ވެގެންދިއުމެވެ. އެހެން ނަމަވެސް ކުއްލިއަކަށް ރައީސުލްޖުމްހޫރިއްޔާ އާއި އޮންނަ ގުޅުން ގޮސްވެ، އެންމެ ފަހުން ދަރިކަލުން ވަޒީރުކަމުން ވަކިކުރައްވައި ޕާޓީގެ ސިޔާސީ ކަންކަމުން ވެސް ވަނީ ދުރުކުރައްވާފައެވެ.

މިއަދު އަބްދުއްރަހީމް ދަންނަ މީހަކު މުޅި ޕީއެންސީގައި ވެސް އުޅޭހެނެއް ހިޔެއް ނުވެއެވެ. އެންމެން ވެސް އަދުރޭ ދޫކޮށް ފިލައިފިއެވެ. މިހާރު އޮތީ %100 ރައީސް މުޢިއްޒަށް ތާއީދުކުރާ މީހުންނެވެ.