މިއަދުގެ ހެނދުނު ހިނގި އެންމެ ޚާއްޞަކަމަކީ މަޖިލިސްގެ ރައީސް ކުއްލިގޮތަކަށް ރައީސުލްޖުމްހޫރިއްޔާގެ އޮފީހަށް ވަޑައިގެން ރައީސުލްޖުމްހޫރިއްޔާ އާއި ބައްދަލުކުރެއްވުމެވެ. ދެބޭފުޅުންގެ ދެމެދުގައި ޚިޔާލުތަފާތުވުންތައް އިންތިހާވެ، އެކުގައި ނުފެންނަތާ އެތަކެއް މަހެއް ފާއިތުވެއްޖެއެވެ. އެކި ކަހަލަ ތުހުމަތުތައް އެއް ބޭފުޅަކު އަނެއް ބޭފުޅަކަށް ކުރެއްވުމާއި، ސިޔާސީ ގޮތުން ހޫނު ރައްދުތައް ދެބޭފުޅުންގެ ދެމެދުގައި ބަދަލުކުރެވިފައ ވެއެވެ. އަދި ދެބޭފުޅުންގެ ދެމެދުގައި އުފެދުނު ޚިޔާލުތަފާތުވުންތައް ޙައްލުކުރުމަށް ކުރެވުނުހާ ކަމެއް ވަނީ މިހާތަނަށް ނާކާމިޔާބުވެފައެވެ.

އެމްޑީޕީގެ ރިޔާސީ ޕްރައިމަރީގައި ދެބޭފުޅުން ވާދަކުރައްްވައި، ކާމިޔާބު ލިބިވަޑައިގަތީ ރައީސް ޞާލިޙަށެވެ. ރައީސް ނަޝީދު އާއި އެމަނިކުފާނަށް ހެޔޮ އެދިވަޑައިގަންނަވާ ފަރާތްތަކުން ތުހުމަތުކުރައްވާ ގޮތުގައި، ރިޔާސީ ޓިކެޓް ހޯއްދެވީ އުޞޫލާއި ހަމަތަކުގެ ބޭރުންކަމަށް ވެއެވެ. އެފަދަ އެއްތުހުމަތަކީ ރިޔާސީ ޕްރައިމަރީއަށް ކުޑަ ދުވަސްކޮޅަކަށް ވެފައި ވަނިކޮށް ޕާޓީގެ ދަފުތަރު ސާފުކުރެއްވުމުގެ ނަމުގައި 39،000 މެންބަރުން ވަކިކުރުމަކީ އެފަދަކަމެއް ކަމަށެވެ. އެފަދަ އަނެއް ތުހުމަތަކީ ނުފޫޒު ބޭނުންކޮށްގެން ގަނޑުކޮށް ފޮށިތަކަށް ވޯޓު އެޅުންކަމަށް ވެއެވެ.

މިއަދު ރައީސް އޮފީހުގައި އޮތް ބައްދަލުވުމަށް ފަހު، ރައީސް ނަޝީދު ކާރުކޮޅުގައި އެނބުރި ވަޑައިގަތީ މީޑިޔާއަށް އެއްވެސް މަޢުލޫމާތެއް ޙިއްސާކުރުމެއް ނެތިއެވެ. ރައީސް ޞާލިޙް މީޑިޔާއަށް ވިދާޅުވީ މަޝްވަރާކުރެވުނީ ރިޔާސީ އިންތިޚާބުގެ ދެވަނަ ބުރާއި އަންނަ މަހު އޮންނަ ނިޒާމީ ވޯޓާ ބެހޭ ގޮތުން ކަމަށެވެ. އެހެން ނަމަވެސް މަޝްވަރާތަކާއި ބެހޭ ތަފުޞީލެއް ނުދެއްވައެވެ. އަދި އެއްބަސް ވެވުނުގޮތެއް ވެސް ހާމައެއް ނުކުރައްވައެވެ.