ރިޔާސީ އިންތިޚާބުގެ ކެމްޕެއިންގައި އެންމެ އަޑުގަދަކޮށް ދެކެވުނު އެއްވާހަކަ އަކީ ށ. އަތޮޅުގެ %70 އެމްޑީޕީއަށް އޮތް ވާހަކައެވެ. އަދި މުޅި ރާއްޖެ އިން ވެސް ރައީސް ޞާލިޙަށް އެންމެ ބޮޑު ތާޢީދެއް އޮތީ ށ. އަތޮޅުގައި ކަމަށެވެ. ށ. އަތޮޅުގައި ހިމެނޭ އިންތިޚާބީ 4 ދާއިރާގެ ރައްޔިތުންގެ މަޖިލިސް މެންބަރުންނަކީ އެމްޑީޕީ މެންބަރުންކަމުގައި ވާތީ އާއި، މެންބަރުންގެ ތެރެއިން ވެސް ގަދަ މެންބަރުން ތިއްބެވީތީއެވެ. އޭގެ ތެރޭގައި ކޮމަންޑޫ ދާއިރާގެ ރަންގޮނޑީގެ ވެރިޔާ މުޙައްމަދު ރާޝިދު އާއި މިލަންދޫ ދާއިރާގެ ޒުވާނުންގެ ހިތްތަކުގެ މެންބަރު ޢަލީ ރިޒާ ހިމެނެއެވެ. އެހެންކަމުން އެމްޑީޕީގެ ޤައުމީ ކެމްޕެއިން ފެއްޓުމުގެ ރަސްމިއްޔާތު ވެސް ބޭއްވިފައި ވަނީ ށ. ފޯކައިދޫގައެވެ.

މުޅިރާއްޖެ އިން ވެސް އެންމެ ބޮޑު އަޣުލަބިއްޔަތެއް ހޯދައިދީ މެޑަލް ޖަހާލަން އެބޭފުޅުން ތިއްބެވީ ފަޚުރުވެރިކަމާ އެކު ތައްޔާރުވެގެންނެވެ. އަދި އެއްބާރުލުން ނުދިން މީހުންގެ ބުރިހަން ނަގަން ވެސް ތިއްބެވީ ތައްޔާރަށެވެ. އަދި ވަޒީފާތަކުން ކަނޑާލާނެ މީހުންގެ ލިސްޓު އޮތީ ދުރާލާ ލިޔެ ފައިނަލް ވެސް ކުރައްވާފައެވެ. އަދި ސްޓޭޓް މިނިސްޓަރުކަމާއި، މިނިސްޓަރުންގެ ނާއިބުންގެ ގޮތުގައި ހަމަޖައްސަވާނެ ސިޔާސީ ބޭފުޅުންގެ ނަންތައް ވެސް އޮތީ ކަނޑައަޅުއްވާފައެވެ. ސަރުކާރުގެ ކުންފުނިތަކުގެ ބޯޑުން ޖާގަދޭނެ ފަރާތްތަކާއި، ކުންފުނިތަކުން ކަނޑާލާނެ އަތޮޅު މީހުން ވެސް ވަނީ ނިންމަވާފައެވެ. އަދި މަޖިލިސް ޕްރައިމަރީ އާއި ކައުންސިލްތަކުގެ ޕްރައިމަރީގައި ވާދަކުރައްވާނެ ފަރާތްތަކާއި، ކާމިޔާބު ކޮށްދެއްވާނެ ފަރާތްތައް ވެސް ވަނީ ނިންމަވާފައެވެ. އިންތިޚާބުތަކުގައި ކެމްޕެއިނަށް ޚަރަދުކުރައްވާނެ ފައިސާ އާއި އެފައިސާ ޚަރަދުކޮށްދެއްވާނެ ފަރާތްތައް ވެސް ވަނީ ހޯއްދަވާފައެވެ. އެގޮތުން ރިޔާސީ ކެންޑިޑޭޓާއި، ރަނިންމޭޓާއި، ކޯޑިނޭޓަރާއި، ޕާޓީގެ ލީޑަރޝިޕަށް އެއްވެސް ޝައްކެއްނެތް މިންވަރަށް މެޖޯރިޓީ ލިބޭނެކަމުގެ ޔަޤީންކަން ވަނީ ދެއްވާފައެވެ. އަދި އެއްބުރުން ކާމިޔާބުކުރާނެކަމަށް ބުނެ ދެއްކި ބިރުތަކަށް އަޑެއް ލައްވާލަން ކެރުނު ހަމަ އެއްވެސް ރަށެއް ފޯކައިދޫ އާއި ފުނަދޫ ފިޔަވާ ނެތް ފަދައެވެ.

އެންމެފަހުން އާޚިރު ނަތީޖާ ލިބުނު ދުވަހު އެންމެންނަށް ލިބުނީ ބޮޑު ހައިރާންކަމެކެވެ. މިލަންދޫ އާއި ފޯކައިދޫ އާއި ކަނޑިތީމުން އުފުރާލަން ބުނި ސުޕަރ މެޖޯރިޓީ ބޮނބިނަރަކަށް ވުރެން ހިމަވެއްޖެއެވެ. އެއާ ޚިލާފަށް އިދިކޮޅުން ވެރިރަށް ފުނަދޫގެ ސުޕަރ މެޖޯރިޓީ ނަގައިފިއެވެ. އެއްބުރުން ނުވިތާ ދެބުރުން ވެސް ކާމިޔާބު ކުރެވޭ ވަރަށް ވުރެން ފަރަޤު ބޮޑުކޮށް އިދިކޮޅު ކެންޑިޑޭޓް ފުރަތަމަ ބުރު ކާމިޔާބުކުރެއްވިއެވެ. އަދި އެއާ އެކު ގަދަބަސް ބުނި އެންމެންގެ ޚަބަރެއް ހިލަމެއް ނެތި ގެއްލިއްޖެއެވެ. ފޯނުކޯލަކަށް، މެސެޖަކަށް ޖަވާބެއް ނުދެއްވުމުން ކެމްޕެއިންގައި އުޅުން ކުދިންކޮޅު ވިއްސި ވިހާލިވެ މަގުމައްޗަށް ނިގަވެފައި ތިބެންޖެހުނެވެ. އަދި ބައެއް ކުދިން ބޮޑު ފަޅިއަށް އަރާ އަންބޮނޑި ހެޔޮވަރު ކޮށްލާ ފަސޭހަގޮތް އިޚްތިޔާރު ކުރިއެވެ. އެއް ހަފުތާ ފަހުން އަނެއްކާ ވެސް ދާއިރާގެ ރައީސުންތައް ޖީބުތައް ފުރާލައިގެން ނިކުންނެވީ ރުފިޔާ އިން ތަޅާ ތިރި ކޮށްލާށެވެ. އެނޫންގޮތެއް ނެތްކަމަށާއި، އެމީހަކަަށް ކިޔަން ކެރުނު އަގެއް ދީފައި ވިޔަސް ވޯޓު ގަނެ އިންތިޚާބު ކާމިޔާބު ކުރައްވާނެކަމަށް ބުނަމުންނެވެ. އެހިސާބުން އަނެއްކާ ވެސް ކުދިންތަކަށް ދުނިޔެ ރަންވެއްޖެ ފަދައެވެ.

ދެވަނަ ބުރުގައި ވެސް އެރުވި އަޑުތަކާއި މުޅިން ޚިލާފަށް އެއްވެސް މީހަކަށް އެއްވެސް އެއްޗެއް ނުލިބި، ފުރަތަމަ ބުރުގައި އޮތް 16000 ވޯޓުގެ ފަރަޤު 19000 އަށް ފުޅާވެގެން ގޮސް ރިޔާސީ އިންތިޚާބު އެމްޑީޕީއަށް ގެއްލިއްޖެއެވެ. ރައީސް ޞާލިޙަށް އެހާ ބޮޑު ނާކާމިޔާބީއެއް ލިބުނީ ކީއްވެތޯ ސުވާލުކޮށްލާނެ ފަރާތެއް ހުރިހެނެއް މިހާރަކު ހިޔެއްނުވެއެވެ.