ޑިފެންސް މިނިސްޓްރީގެ ސީނިޔަރ އެގްޒެކެޓިވް ޑިރެކްޓަރ މުޙައްމަދު ޝާން އެމްޑީޕީ މަޖިލިސް ޕްރައިމަރީގައި އަލަަށް އުފެދުނު އެއް ދާއިރާކަމަށްވާ ހުޅުމާލޭ މެދު ދާއިރާއަށް ވާދަކުރައްވާނެކަން އިޢުލާން ކުރައްވައިފިއެވެ. ޝާން އަކީ އުމުރުން އެންމެ 18 އަހަރުގައި އެމްޑީޕީއާ ގުޅިވަޑައިގެން މިއަދާހަމައަށް ވެސް ދެގޮތެއް ނުވެ ހުންނަވާ ޒުވާން ސިޔާސީ ލީޑަރެކެވެ. ހުޅުމާލެއިން ތަޢުލީމް ޙާޞިލްކޮށް، ހުޅުމާލޭގައި ވަޒަންވެރިވެގެން އުޅުއްވާ ޝާން އަކީ ޢާންމު ރައްޔިތުންނާ ވަރަށް ގުޅޭ، ޕާޓީގެ ޙަރަކާތްތަކުގައި އަބަދުވެސް އެންމެ ކުރީގައި ހުންނަވާ އެއް ބޭފުޅެކެވެ. ނިމިދިޔަ ރިޔާސީ އިންތިޚާބުގައި ވެސް ފާހަގަކޮށްލެވޭ މަސައްކަތްތަކެއް ޢަމަލީގޮތުން ކުރެއްވެވި ބޭފުޅެކެވެ. ނޫސްވެރިކަމުގެ ދާއިރާއިން ދިގު މުއްދަތެއްގެ ތަޖުރިބާ ލިބިވަޑައިގެން ހުންނެވި ސޯޝަލް މީޑިޔާ އެކްޓިވިސްޓް ޝާން އާއި ވާދަކުރައްވަނީ ޝަފާތުކަމަށް މަޢުލޫމާތު ލިބިފައި ވެއެވެ. ޝަފާތު ފާހަގަކުރެވެނީ އެމްޑީޕީގެ ކުރީގެ ރައީސް މުޙައްމަދު ނަޝީދަށް ވަފާތެރި ބޭފުޅެއްގެ ގޮތުގައެވެ. އެގޮތުން ރިޔާސީ ޕްރައިމަރީގައި އެކަމަނާ ތާޢީދުކުރެއްވީ އަދި ކެމްޕެއިން ކޮށްދެއްވީ ވެސް ރައީސް ނަޝީދަށެވެ. އެހެން ނަމަވެސް ރިޔާސީ ޕްރައިމަރީ ނާކާމިޔާބުވުމުން އަލުން ރައީސް އިބްރާހީމް މުޙައްމަދު ޞާލިޙަށް ތާޢީދުކުރައްވާ ފޮރިން މިނިސްޓްރީގެ ސިޔާސީ މަޤާމަކަށް ވަޑައިގަތެވެ.

ޝާން ފާހަގަކުރެވެނީ އަބަދުވެސް އެމްޑީޕީއަށާއި، ޕާޓީގެ ލީޑަރޝިޕަށް އަބަދުވެސް ވަފާދާރު، ޚިދުމަތްތެރި، ޢާންމު މެންބަރުންނާ ވަރަށް ގުޅޭ ޒުވާން ބޭފުޅެއްގެ ގޮތުގައެވެ. ޝާން އަކީ ކޮންމެ ވަގުތެއްގައި ވެސް ކޮންމެ މީހަކާ އެކު ވެސް ކޮޕީބޯލާ ޚިޔާލު ބަދަލުކޮށްލުމުގެ ފުރުޞަތު ދެވޭނެ ބޭފުޅެކެވެ. ޑިފެންސް މިނިސްޓްރީގައި ސިޔާސީ މަޤާމެއްގައި ވަޒީފާ އަދާކުރެއްވި ނަމަވެސް ޝާން އަކީ އެންމެންނާ ވެސް ގުޅޭ ވަރަށް ހިތްތިރި ބޭފުޅެކެވެ. އަދި ވަރަށް ގިނަ ބައެއްގެ ވަރަށް ގާތް މިތުރެކެވެ. ކުޑައެއް ބޮޑެއް، ދޮށީ އުމުރުފުރައެއް ތަފާތެއް ނެތި، ފެންނަ ކޮންމެ މީހަކަށް ގޮވާލާ އުޅޭ މީހެކެވެ. އެހެންކަމުން ޝާން އަކީ ރައްޔިތުންގެ ޚާދިމަކަށް ވަރަށް ފުރިހަމައަށް ފައްކާވެފައި ހުރި ރައްރިތުންގެ ރައްޔިތުމީހާއެވެ. އެހެންކަމުން މަޖިލިސް ޕްރައިމަރީގައި ވާދަކުރައްވާނެކަން އިޢުލާން ކުރެއްވުމާ އެކު އެކުވެރިންނާއި، ދަންނަ ރަޙްމަތްތެރިން އަމިއްލައަށް އިސްނަންގަވާ ކެމްޕެއިން ވަނީ ފައްޓަވާފައެވެ. އެގޮތުން ހެޔޮ އެދޭ ފަރާތްތަކުން ސޯޝަލް މީޑިޔާގައި ފަތުއަޑުކިޔާފައި ކެމްޕެއިން ކުރިއަށް އެބަގެންދަވައެވެ. ހުޅުމާލޭ މެދު ދާއިރާ ވެގެންދާނީ ވަރަށް ވެސް ވާދަވެރި، ވަރަށް ވެސް ފޯރިގަދަ ދާއިރާއެއްކަން ޔަޤީނެވެ.