ކޮމަންޑޫ ދާއިރާގެ ރައްޔިތުންގެ މަޖިލިސް އިންތިޚާބަކީ އަބަދުވެސް އާދަޔާ ޚިޔާލަށް ވާދަވެރި އަދި ފޯރިގަދަ އިންތިޚާބެކެވެ. ކޮމަންޑޫ ދާއިރާގައި ހިމެނެނީ ކޮމަންޑޫ، މަރޮށި އަދި ފޯކައިދޫއެވެ. މިފަހަރު ކޮމަންޑޫ ދާއިރާއަށް ޕީއެންސީގެ ފަރާތުން ވާދަކުރައްވާނެކަން މިހާތަނަށް އިޢުލާންކުރައްވާފައި ވަނީ އެންމެ ފަރާތަކުންނެވެ. އެއީ ކޮމަންޑޫގެ ބޭފުޅެއްކަމަށްވާ އިބްރާހީމް ވަޙީދުއެވެ. އޭނާ ވަނީ ފުލުހުންގެ ޚިދުމަތުގައި 20 އަހަރަށް ވުރެން ދިގު މުއްދަތެއް ހޭދަކުރެއްވުމަށް ފަހު، ރައްޔިތުންގެ މަޖިލިސްގެ އިންތިޚާބުގައި ވާދަކުރެއްވުމަށްޓަކައި، ޝަރަފުވެރިކަމާ އެކު ރިޓަޔަރ ކުރެއްވުމަށް ހުށަހަޅުއްވާފައެވެ. ފުލުހުން ޚިދުމަތުގައި ތަފާތު އެކި އަތޮޅުތަކުގެ އަތޮޅު ކޮމާންޑަރުގެ ގޮތުގައި މަސައްކަތްކުރައްވާފައިވާ ބޭފުޅެކެވެ. އަދި ވައްޑެ އަކީ ށ. އަތޮޅުގެ ކޮމާންޑަރުކަމުގެ މަޤާމުގައި މިހާރު ވެސް ހުންނެވި ބޭކަލެކެވެ. އަދި އަމިއްލަފުޅަށް ރިޓަޔަރ ކުރައްވަނީ ކޮމަންޑޫ ދާއިރާގެ ރައްޔިތުންނަށް ސިޔާސީ ޚިދުމަތެއް ފޯރުކޮށްދެއްވުމުގެ ޝައުޤުވެރިކަމުގައެވެ.

އިބްރާހީމް ވަޙީދު (ވައްޑެ) އަކީ ވިޔަފާރި ހިންގުމުގެ ދާއިރާއިން މަތީ ތަޢުލީމު ޙާޞިލްކުރައްވާފައިވާ ބޭފުޅެކެވެ. އެގޮތުން އޭނާ ވަނީ މައިކޮލެޖުން މާސްޓަރ އޮފް ބިޒްނެސް އެޑްމިނިސްޓްރޭޝަން ޙާޞިލްކުރައްވާފައެވެ.

ވައްޑެ ސާރ ވަނީ މިހާރު ތާޢީދު ހޯއްދެވުމުގެ މަސައްކަތް ފަށްޓަވާފައެވެ. އެގޮތުން ދާއިރާގެ ތިން ރަށުން މާލޭގައި ދިރިއުޅޭ ފަރާތްތަކާއި ބައްދަލުކުރައްވާ އޭނާގެ ސިޔާސަތުތަކާއި، ކުރިމަތި ލެއްވުމުގެ މަޤުޞަދުތައް ގެންދަވަނީ ކިޔައިދެއްވަމުންނެވެ. އަދި ވަކިން ޚާއްޞަކޮށް ދާއިރާގެ ޒުވާނުންގެ ވިސްނުން ހުރިނެތް ގޮތް ގެންދަވަނީ ދިރާސާކުރައްވަމުންނެވެ. ލަފާކުރެވޭ ގޮތުގައި ޕީއެންސީ އިން މަޖިލިސް ޕްރައިމަރީއެއް ބާއްވަން ޖެހޭނެއެވެ. އެހެނީ ރަސްމީކޮށް އިޢުލާން ކުރައްވާފައި ނެތް ނަމަވެސް ޕީޕީއެމްގެ ކޮމަންޑޫ ދާއިރާގެ ރައީސްގެ ވިސްނުންފުޅު ހުރިކަމަށް މަޢުލޫމާތު ލިބެއެވެ. އެއީ އެންމެންގެ މުޙައްމަދުބެ (ތެޔޮ މުޙައްމަދުބެ) އެވެ. އެބޭފުޅާ އަކީ ވަރަށް ގިނަ ބަޔަކު ދަންނަ އަދި މީހުންނާ ވަރަށް ގުޅޭ މަޑުމައިތިރި އަޚުލާޤު ރަގަޅު ބޭފުޅެކެވެ. އަދި ތިން ރަށުގެ ޕީޕީއެމް/ޕީއެންސީ ސްޓިއަރިންގ ކޮމިޓީ އިން ވެސް އެފަދަ ނިންމުމެއް ނިންމަވާފައި އޮތްކަމުގެ އަޑުތަކެއް ވެސް ވަނީ ފެތުރިފައެވެ.