20 ވަނަ ރައްޔިތުންގެ މަޖިލިސްއަށް މެންބަރުން އިންތިޚާބުކުރުމަށް ބާއްވާ އިންތިޚާބުގައި ޕީޕީއެމް/ޕީއެންސީގެ ފަރާތުން ވާދަކުރައްވާނެ ކެންޑިޑޭޓަކު ކަނޑައެޅުމަށް އޮންނަ މަޖިލިސް ޕްރައިމަރީގައި މިލަންދޫ ދާއިރާއަށް ސިޔާސީ ވަރުގަދަ ލީޑަރުންތަކެއް ކުރިމަތިލައްވާނެކަން ވަނީ އިޢުލާންކުރައްވާފައެވެ. އެގޮތުން ށ. ފީވަކު ޒޭވަރު މުޙައްމަދު ނަބީލް ވެސް ވަނީ މަޖިލިސް ޓިކެޓަށް ވާދަކުރައްވާނެކަން އިޢުލާން ކުރައްވާފައެވެ. ނަބީލް ފާހަގަކުރެވެނީ ޕީޕީއެމްގެ ޙަރަކާތްތަކުގައި އެންމެ ކުރީގައި އުޅުއްވާ ޖެހިލުން ކުޑަ ހީވާގި ކެރޭ ބަސްމޮށުންތެރި ޒުވާން ލީޑަރެއްގެ ގޮތުގައެވެ. ނަބީލް ވާދަކުރައްވާނެކަން އިޢުލާން ކުރެއްވުމާއެކު ޕީޕީއެމް/ޕީއެންސީގެ ސަޕޯޓަރުން ސޯޝަލް މީޑިޔާގައި ގެންދަނީ ވަރަށް ބޮޑަށް އުފާ ފާޅުކޮށް އެކަމަށް މަރްޙަބާ ކިޔަމުންނެވެ. އަދި ކެމްޕެއިން ވެސް އޭގެ ޒާތުގައި ވަނީ ފެށިފައެވެ.

ނަބީލްގެ އިތުރުން ކުރީގެ މެންބަރު ހަސަނާއާ މިހާރުގެ އަތޮޅު ކައުންސިލްގެ ރައީސް މުޙައްމަދު ޝިޔާމްއާ ކުރީގެ އަތޮޅު ކައުންސިލްގެ މެންބަރު ފާއިޒް ވެސް ގެންދަވަނީ ކެމްޕެއިން ކުރައްވަމުންނެވެ. އެހެންކަމުން ދާއިރާގެ ސިޔާސީ ތަޖުރިބާކާރުން ވިދާޅުވާގޮތުގައި މިލަންދޫ ދާއިރާގެ މަޖިލިސް ޕްރައިމަރީ މިފަހަރު ގަދަ ހިފުމަކަށް ދާނެއެވެ. މިލަންދޫ ދާއިރާގައި ހިމެނެނީ ތިން ރަށެވެ. އެއީ މިލަންދޫ، ނަރުދޫ އަދި ފީވަކެވެ. ތިން ރަށުގެ ތެރެއިން އެންމެ އާބާދީ ބޮޑު ރަށަކީ މިލަންދޫއެވެ. އަދި އަނެއް ދެރަށް އެއްކޮށްލުމުން ވެސް މިލަންދޫއާ އަރާ ހަމައެއް ނުވެއެވެ. އެހެންކަމުން މިހާތަނަށް ދާއިރާ ތަމްސީލުކުރައްވާފައި ވަނީ މުޅިން ވެސް މިލަންދޫއަށް ނިސްބަތްވާ ބޭފުޅުންނެވެ.