ށ. އަތޮޅު ކައުންސިލުން އިންތިޒާމްކުރާ ފުޓްސަލް މުބާރާތް މާދަމާ ށ. މާއުނގޫދޫގައި ފެށިގެންދާނެއެވެ. އަތޮޅުގެ ހުރިހާ ރަށަކުން ޓީމްތައް ބައިވެރިވާ މި މުބާރާތަކީ އަތޮޅަށް އަންނަ ކުޅިވަރުގެ ބޮޑު ޢީދެކެވެ. އަތޮޅުގެ ހުރިހާ ރަށެއްގައި ވެސް މުބާރާތައް ތައްޔާރުވުމުގެ ޙަރަކާތްތައް ކުރިއަށް އެބަ ދެއެެވެ. އަދި ވަކިން ޚާއްޞަކޮށް މުބާރާތުގެ މެޗްތައް ބާއްވާ ދެރަށުގައި ވަރަށް ފޯރީގައި ތައްޔާރީތައް ވަމުން އެބަ ގެންދެއެވެ.

މުބާރާތް ހުޅުވުމުގެ ރަސްމިއްޔާތު ބޭއްވުމަށް ހަމަޖެހިފައި ވަނީ މާދަމާ ހަވީރު ށ. މާއުނގޫދޫގައެވެ. ރަސްމިއްޔާތުގެ ޝަރަފުވެރި މެހެމާނަކީ މަޝްހޫރު ފުޓްބޯޅަ ތަރި ޢަލީ އަޝްފާޤު (ދަގަނޑޭ) އެވެ. އަދި މުބާރާތުގެ ފައިނަލް މެޗާ ނިންމުމުގެ ރަސްމިއްޔާތު ބޭއްވުމަށް ހަމަޖެހިފައި ވަނީ ށ. ގޮއިދޫގައެވެ.

ށ. އަތޮޅުގައި ހިމެނޭ 14 ރަށުން ޓީމްތައް ބައިވެރިވާ މި މުބާރާތް ކުރިއަށް ދާނީ ދެ ގްރޫޕަކަށް ބަހާލައިގެން ކަމަށް ށ. އަތޮޅު ކައުންސިލުން މަޢުލޫމާތު ދެއެވެ. ބޮޑެތި ފައިސާގެ އިނާމްތަކާ އެކު ބޭއްވޭ މި މުބާރާތަކީ ށ. އަތޮޅުގައި ބޭއްވޭ މިފަދަ އެންމެ ބޮޑު މުބާރާތެެވެ. މިއީ ށ. ރައީސް މުޙައްމަދު ޝިޔާމް (ޝިޔަންޓޭ)ގެ ޒަޢާމަތުގައި ފެށިފައިވާ ކުޅިވަރު ޙަރަކާތެކެވެ. ފުރަތަމަ ބުރާތް އޮތީ މިދިޔަ 2022 ވަނަ އަހަރުގައެވެ.