ކްރިކެޓް ވޯލްޑް ކަޕް 2023 އޮސްޓްރޭލިޔާ އިން ކާމިޔާބުކުރީ ފައިނަލް މެޗްގައި އިންޑިޔާ އާއި ދެކޮޅަށް ކުޅެ 6 ވިކެޓުންނެވެ. އޮސްޓްރޭލިޔާއަށް ޓޮސް ދިމާވުމުން ނިންމީ ފީލްޑް ކުރާށެވެ. އަދި އިންޑިޔާ އިން ބެޓް ކުރިއެވެ. އެގޮތުން 50 އޯވަރުގެ ތެރޭގައި 6 ކުޅުންތެރިން ނުބައިވި އިރު ހެދުނީ 240 ލަނޑެވެ. މިއަހަރުގެ ކްރިކެޓް ވޯލްޑް ކަޕްގެ ހޯސްޓުކުރާ ޤައުމަކީ އިންޑިޔާކަމުން މުޅި ދަނޑު އޮތީ ފުރާލާފައެވެ. އަދި މުޅި އިންޑިޔާ އޮތީ ވޯލްޑް ކަޕް ކާމިޔާބުކުރުމުގެ އުންމީދުގައެވެ.
ބަދަލުގައި އޮސްޓްރޭލިޔާ އިން ކުޅެން ނިކުމެ 43 އޯވަރުގެ ތެރޭގައި 4 ކުޅުންތެރިން ނުބައިވިޔަސް 241 ރަން ހަދާ ވޯލްޑް ކަޕް ކާމިޔާބުކުރި އިރު، ބާކީ 7 ވޯވަރު އޮތެވެ. މިއީ އޮސްޓްރޭލިޔާ އިން ވޯލްޑް ކަޕް ކާމިޔާބުކުރި 6 ވަނަ ފަހަރެވެ. އޮސްޓްރޭލިޔާ އާއި އިންޑިޔާ އާއި ބައްދަލުކުރި ފައިނަލް މެޗު ވެގެންދިޔައީ ވަރަށް ވެސް ތަފާތު އަދި ފޯރި ގަދަ ކްރިކެޓް މެޗަކަށެވެ.
އަދި ވަކިން ޚާއްޞަކޮށް އިންޑިޔާގެ ސަޕޯޓަރުންގެ ފަރާތުން ފެނުނީ ވަރަށް ވެސް ފޯރި އާއި ޖޯޝް ކުރިއަށް ނެރެ، އެމީހުންގެ ޤައުމުގެ ޓީމަށް ސަޕޯޓްކުރާ މަންޒަރެވެ. ފައިނަލް މެޗް ބައްލަވާލެއްވުމަށް ބޮޑުވަޒީރު ނަރެންދްރަ މޯދީގެ އިތުރުން މަޝްހޫރު އެތަކެއް ފަންނާނުން ވަނީ ދަނޑަށް ވަދެފައެވެ. އިންޑިޔާ އިން ވަނީ ކްރިކެޓް ވޯލްޑް ކަޕް 2 ފަހަރެއްގެ މަތިން ކާމިޔާބު ކޮށްފައެވެ. އަދި 1975 ވަނަ އަހަރުން ފެށިގެން ހުރިހާ ވޯލްޑް ކަޕެއްގައި އިންޑިޔާ ބައިވެރިވެފައި ވެއެވެ.
