ގުރޫޕް ބީ ގެ ތިންވަނަ މެޗުގައި މަރޮށި ޓީމުން ފުރަތަމަ ހާފްގައި 2 ލަނޑު ޖަހައި ކުރީގައި އޮއްވައި ފަހު ހާފުގައި މާއުނގޫދޫ ޓީމުން 5 ލަނޑު ޖަހައި 5-2 ން މެޗު ކާމިޔާބު ކޮށް ފެންވަރު ދައްކާލައިފި
ފުރަތަމަ ހާފުގެ ވަރަށް ކުރީ ކޮޅު މަރޮށި ޓީމުން 2 ލަނޑު ޖަހައި ވަރަށް ފޯރީގައި މުޅި މެޗު ކޮންޓްރޯލް ކޮށްގެން ކުޅެ ހާފު ނިންމާލިއެވެ. ދެވަނަ ހާފުގައި ބަދަލުތަކަކާއި އެކު ކުޅެން އަރައި ކުޅުން ރަނގަޅު ކޮށް ދެވަނަ ހާފުގެ ކުރީ ކޮޅު މާއުނގޫދޫ ޓީމުގެ ޖާޒީ ނަންބަރ 4 އިސްމާއީލް ސިނާނު (ބަބޫ) މާއުނގޫދޫ ޓީމަށް ފުރަތަމަ ލަނޑު ކާމިޔާބު ކޮށްދިނެވެ. އޭގެ ކުޑަ ވަގުތު ކޮޅެއްފަހުން ލިބުނު ހިލޭ ޖެހުމަކުން މާއުނގޫދޫ ޓީމުގެ ޖާޒީ ނަންބަރ 10 ހުސައިން މުނާޒު އިތުރު ލަނޑެއް ކާމިޔާބުކޮށް ނަތީޖާ ހަމަހަމަ ކޮށްދިނެވެ.
ދެވަނަ ހާފުގެ މެދެއްހާ ހިސާބުގައި މަރޮށި ޓީމުގެ ކީޕަރު ކުރި ފައުލަކާއި ގުޅިގެން ލިބުނު ޕެނަލްޓީ ކާމިޔާބުކޮށް ފުރަތަމަ ފަހަރަށް މާއުނގޫދޫ އަށް ލީޑު ނަގައިދިނީވެސް ޖާޒީ ނަންބަރ 10 ހުސައިން މުނާޒެވެ.
މާއުނގޫދޫ ގެ ހަތަރުވަނަ ލަނޑު ޖަހައިދިނީ ފުރަތަމަ ލަނޑު ކާމިޔާބު ކޮށްދިން އިސްމާޢީލް ސިނާނުއެވެ. މާއުނގޫދޫ ޓީމުގެ ފަހު ލަނޑު ކާމިޔާބު ކޮށްދިނީ ތަޖުރިބާކާރު ކުޅުންތެރިޔާ އިބްރާހިމް ސިނާނު (ބޮއިކޮ) އެވެ. ފޯރިގަދަ މެޗުގެ މޭން އޮފް ދަ މެޗަކަށް ހޮވުނީ މާއުނގޫދޫ ޓީމުގެ ޖާޒީ ނަންބަރ 4 އިސްމާއީލް ސިނާނު (ބަބޫ) އެވެ.
މިއީ މިލައުތުރު މުބާރާތް ބާއްވަން ފެށިފަހުން މާއުނގޫދޫ ޓީމުން ހޯދި ފުރަތަމަ މޮޅުކަން ފާހަގަކުރެވެއެވެ. މާއުނގޫދޫ ޓީމުގެ ދެވަނަ މެޗު އޮތީ 22 ނޮވެމްބަރ 2023 ވާ އަންގާރަ ދުވަހުގެ 16:00 ގައެވެ.
