މިލައުތުރު ފުޓްސަލް މުބާރާތް ގައި ގުރޫޕް ބީ ގެ ނުވަވަނަ މެޗުގައި އެންމެ ފަހުގެ ޗެންޕިއަން ފުނަދޫ އާއި ޅައިމަގު ބައްދަލު ކުރި މެޗު ފުނަދޫ ޓީމުން ކާމިޔާބު ކޮށްފިއެވެ. މިރޭ 20:15 ގައި ކުޅުނު މެޗުން ފުނަދޫ މޮޅުވީ 1-0 ގެ ނަތީޖާ އަކުންނެވެ.
މުޅި މެޗު އެއްކޮން ކަހަލަ ގޮތަކަށް މޮޅަށްކުޅެ ގިނަ ހަމަލާތައް އުފެއްދީ ޅައިމަގު ޓީމުން ކަން ފާހަގަ ކޮށްލެވެ އެވެ. މެޗުގައި ޅައިމަގު ޓީމުން އުފެއްދި ހަމަލާތަކުގެ ހުރަހަކަށްވީ ފުނަދޫ ޓީމުގެ ކީޕަރު އިބްރާހިމް ނަޖީލުއެވެ. މެޗުގެ ފުރަތަމަ ހާފު ނިމުނީ ދެޓީމު ކުރެ އެއްވެސް ޓީމަކަށް ލަނޑެއް ނުޖެހި އެވެ.
މި މެޗުގައި ފެނިގެން ދިޔަ ހަމައެކަނި ލަނޑު ފެނިގެން ދިޔައީ މެޗުނިމެން 4 މިނެޓަށް ވެފައިވަނިކޮށެވެ. މިލަނޑަކީ ފުނަދޫ ޓީމުގެ ކުޅުންތެރިޔަކު ޅައިމަގު ގޯލް ކުރިމަށްޗަށް ހުރަސްކޮށްލި ބާރު ބޯޅައެއް ޅައިމަގު ޓީމުގެ ޖާޒީ ނަންބަރ 7 މުޙައްމަދު އަލީފުގެ ފައިގައި ޖެހިފައި ބައިކޮޅަށް ވަތް ގޯލެކެވެ.
މި މެޗުގެ މޮޅު ކުޅުންތެރިޔަކަށް ހޮވުނީ ޅައިމަގު ޓީމުގެ ހޫނު ހަމަލާތަކުގެ ހުރަހަކަށްވި ފުނަދޫ ޓީމުގެ ކީޕަރު އިބްރާހިމް ނަޖީލެވެ. މިމޮޅާއެކު ފުނަދޫ ޓީމުން މިވަނީ ކުޅުނު ތިންމެޗުގެ ތެރެއިން ދެމެޗު ކާމިޔާބުކޮށް ހަ ޕޮއިންޓު ހޯދާ ފައެވެ. ފުނަދޫ ޓީމުން ދެންމެޗެއް ކުޅޭނީ 25 ނޮވެމްބަރ ގައެވެ. މި މެޗުގައި ބައްދަލުކުރާނީ މަރޮށި އާއެވެ. މިމެޗުން ބަލިވި ޅައިމަގު ޓީމަށް ތިންމެޗުގެ ތެރެއިން ކާމިޔާބު ކުރެވުނީ އެންމެ މެޗެކެވެ. ޅައިމަގު ޓީމުން މާދަމާ ނުކުންނާނީ މިދިޔަ އަހަރުގެ ރަނަރަޕް ނަރުދޫ އާއި ދެކޮޅަށެވެ.
