ސަރުކާރަކީ މަތި ބަރު ސަރުކާރެއްތޯ ނޫންތޯ ނިންމަން އަދި މާ އަވަސް ނޫންތޯއެވެ. އެހެން ނަމަވެސް ވުޒާރާތައް ގިނަވުމާ ވަޒީރުންގެ ފެންވަރު ދަށް ވެއްޖެ ނަމައީ އެކަން ފޫބެއްދުމަށް ގިނަ ސްޓޭޓް މިނިސްޓަރުންނާ ނައިބުންނާ ޑިރެކްޓަރުން އައްޔަނުކުރަން ޖެހޭނެއެވެ. މިހާތަނަށް ވަޒީރުންގެ ފެންވަރުގައި އެތައް ބައެއް އައްޔަނުކުރުމުގެ އިތުރުން ސްޓޭޓް މިނިސްޓަރުންނާއި، މިނިސްޓަރުންގެ ނައިބުން ފެންވަރުގެ މަޤާމުތަކަށް ވަނީ ގިނަ ބަޔަކު އައްޔަނު ކޮށްފައެވެ.
ނިމިދިޔަ ސަރުކާރާ މެދު ރައްޔިތުން މާޔޫސްވެ، ރަގަޅު ސަރުކާރެއްް ހޯދުމަށް ކުރި އުންމީދުތައް ޙާޞިލުކުރެވިދާނެ ކަމާ މެދު މިހާރު ވެސް ބައެއް މީހުންގެ ހިތުގައި ސުވާލު އުފެދެން ފަށައިފިއެވެ. މިނިސްޓަރުންނަށް ރުހުން ނުލިބެނީސް ވާހަކަތައް ގިނަ ވުމާއި، ބަދަލުތައް އިޢުލާންކުރުން އަވަސްކަމުންނާއި، ސިޔާސީ މަޤާމުތައް އެއްވެސް ބެލުމެއް ނެތި ހަމަޖެއްސެވުމާއި، ޤުރުބާނީތައް ވީ މީހުން ބާކީ ވުމާއި، ދެޕާޓީގެ ތަޅާފޮޅުންތައް އުތުރި އަރަން ފެށުމުގެ ސަބަބުންނެވެ.
ރައީސް މުޢިއްޒުގެ ސަރުކާރަކީ ޕާޓީ ފިކުރަށް ބެލުމެއް ނެތި، ހެޔޮ ވެރިކަމެއް ހޯދުމުގެ އުންމީދުގައި ރައްޔިތުން އިންތިޚާބުކުރި ސަރުކާރެކެވެ. މިހާ އަވަހަށް ރައްޔިތުން މާޔޫސް ވާފަދަ ގޮތްތަކެއް ފެންމަތި ވުމަކީ ވަރަށް ވެސް ދެރަކަމަކަށް ވާނެއެވެ. އަދި ކުރިމަގުގައި ގޮންޖެހުންތަކާ ކުރިމަތި ވާނެކަމެކެވެ. މިހުރިހާ ކަމަކާ އެކު ވެސް ރައީސް މުޢިއްޒުގެ ފަރާތްޕުޅުން ނުފެންނާނެ ކަމަށް މީހުން ޤަބޫލުކުރާ އެއްކަމެއް އެބަ އޮތެވެ. އެއީ ރައްޔިތުންނަށް އަނިޔާވެރި ނުވާނެކަމުގެ ޔަޤީންކަމެވެ.
