މިލައުތުރު ފުޓްސަލް މުބާރާތް ގައި ގުރޫޕް ބީ ގެ އެގާރަވަނަ މެޗުގައި ޅައިމަގުން  މިދިޔަ އަހަރުގެ ރަނަރަޕް ނަރުދޫ މޮޅުވިޔަ ނުދީ ހިފަހައްޓައިފިއެވެ.ފޯރިގަދަ ކުޅުމެއް ފެނިގެންދިޔަ މެޗުގައި ފުރަތަމަ ލަނޑުޖަހައި ކުރިހޯދީ ނަރުދޫ ޓީމުން ނެވެ. މިލަނޑު އެ ޓީމަށް ކާމިޔާބު ކޮށްދިނީ މުޙައްމަދު އަޒުމޫނެވެ. ފުރަތަމަ ހާފު ނިމުނީ 1 – 0 ގެ ނަތީޖާއަކުން ނަރުދޫ ކުރީގައި އޮވެގެންނެވެ. 

ދެވަނަ ހާފު ފެށިގެން 2 ވަނަ މިނެޓުގައި ޅައިމަގު ޓީމުގެ ޖާޒީ ނަންބަރ 10 ޢަބްދުލް ބާޞިތު ލަނޑެއްޖަހައި މެޗުގެ ނަތީޖާ ހަމަހަމަކޮށްދިނެވެ. އޭގެ 2 މިނެޓު ފަހުން ނާޢިލް ޞަބާޙު ލަނޑެއް ޖަހައި ނަރުދޫ އަށް ދެވަނަ ފަހަރަށް ލީޑު ނަގައިދިނެވެ. ނަމަވެސް މާގިނައިރު ނަރުދޫއަށް ލީޑު ދެމެހެއްޓޭގޮތެއް ނުވިއެވެ. ޅައިމަގު ޓީމުގެ އާދަމް ރީހާނު ލަނޑެއް ޖަހައި ނަތީޖާ ހަމަހަމަ ކުރިއެވެ. މެޗު ނިމިގެން ދިޔައީ 2-2 ގެ ނަތީޖާ އަކުން ދެ ޓީމު އެއްވަރު ވެގެންނެވެ.

މި މެޗުގެ މޮޅު ކުޅުންތެރިޔަކަށް ހޮވުނީ މެޗުގައި މޮޅު ކުޅުމެއް ދެއްކި  ޅައިމަގު ޓީމުގެ ޖާޒީ ނަންބަރ 5 ޢަބްދުލްކަރީމް އަޙްމަދެވެ. ޅައިމަގު ޓީމުން ހޮނިހިރު ދުވަހު 17:00 ގައި ނުކުންނާނީ މާއުނގޫދޫ އާއި ދެކޮޅަށެވެ. ނަރުދޫ ޓީމުން ހޮނިހިރު ދުވަހުގެ ރޭ ނުކުންނާނީ ކޮމަންޑޫ އާއި ދެކޮޅަށެވެ.