ޑރ. މުޢިއްޒުއާ ޕީޕީއެމްގެ ލީޑަރޝިޕްގެ ބޭފުޅުން ވަނީ ވަަރަށް ބޮޑަށް ޚިޔާނާތްތެރި ވެފައި ކަމަށާއި، ރައީސް މުޢިއްޒު ހުންނެވީ ޖާހިލެއްގެ ފައި ދަށުވެފައި ކަމަށް ކުރީގެ ނައިބު ރައީސް އަދި ކުރީގެ ރައީސް ޢަބްދު ﷲ ޔާމީން ޢަބްދުލް ޤައްޔޫމްގެ އިސް ޤާނޫނީ ވަކީލް ޑރ. މުޙައްމަދު ޖަމީލް އަޙްމަދު ވިދާޅުވެއްޖެއެވެ.

އަދަދު ނޫހުގެ އެތެރެފުށް ޕްރޮގްރާމަށް ދެއްވި ބަސްދީގަތުމެއްގައި ޑރ. ޖަމީލް ވަނީ ޕީޕީއެމްގެ ލީޑަރޝިޕަށް ވަރަށް ބޮޑަށް ފާޑުވިދާޅުވެފައެވެ. ޖަމީލް ވިދާޅުވިގޮތުގައި މިއަދު އެމީހުން ތިބީ މަޤާމާ ޖާޙަށްޓަކައި، ވަޢުދާ އަހުދު އުވާލައިގެން ކަމަށެވެ. އެގޮތުން ވެރިކަމަށް ވަޑައިގަތުމަށް ރައީސް ޔާމީންގެ ނަންފުޅު ބޭނުންކުރައްވައި، އެއީ އެންމެ އިސް ލީޑަރުކަމުގައި ގޮވަމުން ކެމްޕެއިން ކުރެއްވުމަށް ފަހު، ކާމިޔާބު ވުމުން އެމަނިކުފާނާ ގުޅުން ކަނޑުއްވާލައްވާފައި ވާކަމަށެވެ. އަދި އެއްވެސް ކަމަކާ މަޝްވަރާއެއް ކޮށްލަންވަން ބޭނުންފުޅު ނުވާތާ އެމަނިކުފާނު ގުޅުއްވުމުން ފޯނު ވެސް ނުނަންގަވާ ކަމަށެވެ.

ޑރ. މުޢިއްޒު ވެސް ވެރިކަމަށް ނިކުންނެވީ ރައީސް ޔާމީން މިނިވަންކުރެއްވުމުގެ ވަޢުދާ އެކުގައެވެ. އެހެން ނަމަވެސް މިހާރު އެމަނިކުފާނު މިނިވަންކުރެއްވުން ވެސް ވެފައި ވަނީ ދެވަނަ ޖަރަޖައިގެ ކަމެއްގެ ގޮތުގައެވެ. ޑރ. ޖަމީލް ތަކުރާރުކޮށް ވިދާޅުވީ އެއީ ބޮޑު ޚިޔާނާތެއްކަމަށާއި، ހުރިހާ އަނިޔާއެއް ޖަލުގައި ތަޙައްމަލުކުރެއްވީ އެހެން މީހެއް ނޫންކަމަށާއި، ރައީސް ޔާމީން ކަމަށެވެ. އެހެން ވީމާ މިއަދު އެކަމުގެ އަގު އަދާކުރަން ވާނީ މިގޮތައް ނޫން ކަމަށެވެ.

ޖަމީލް އިތުރަށް ވިދާޅުވިގޮތުގައި ރައީސް ޔާމީން ހުންނެވީ ވަރަށް ގަދަކޮށް ކަމަށާއި، ސިޔާސީ މަސައްކަތްޕުޅު ކުރެއްވުމަށް އައު ޕާޓީއެއް އުފެއްދެވުމުގެ ހުއްދައަށް މާދަމާ އިލެކްޝަންސް ކޮމިޝަނަށް ހުށަހަޅުއްވާނެ ކަމަށެވެ. އަދި ފާޓީ އުފެއްދުމުގައި އެންމެ ފުރަތަމަ ސޮއި ކުރަން ބޭނުންވާ މީހުންގެ މެދުގައި ވާދަވެރިކަމެއް އޮންނަހާ ވެސް ބޮޑު ތަރުޙީބެއް ލިބިފައި ވާކަމަށެވެ. އަދި ކުރިއަށް އޮތް ރައްޔިތުންގެ މަޖިލިސް އިންތިޚާބަށް މަސައްކަތްޕުޅު ކުރައްވާނީ އަލަށް އުފައްދަވާ ޕާޓީގެ ފަރާތްޕުޅުން ކަމަށާ ރައީސް ޔާމީން އަކީ އަބްދުލް ރަހީމް އެޅިހާ ބަތަކަށް ރިހަވެގެން ހުންނަވާނެ ޖާހިލެއް ނޫންކަމަށެވެ.