“މިލައުތުރު ފުޓްސަލް ޗެލެންޖް 2023” ގެ ގުރޫޕް ބީ ގެ ސާދާވަނަ މެޗުގައި މަރޮށި ޓީމާއި ވާދަކޮށް ފުނަދޫ ޓީމުން މެޗު ކާމިޔާބު ކޮށްފި

ދެޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔަ މެޗު ފުނަދޫ ޓީމުން ކާމިޔާބު ކުރީ 1-0 ގެ ނަޖީޗާ އަކުން ނެވެ.

މެޗުގެ ފުރަތަމަ ހާފު ނިމިގެން ދިޔައީ ދެޓީމު ކުރެ ޓީމަކަށް ލަނޑެއް ނުޖެހި އެވެ. މެޗުގައި ފެނުނު ހަމައެކަނި ލަނޑު ފެނިގެން ދިޔައީ ދެވަނަ ހާފުގައެވެ. މިލަނޑު ފުނަދޫ ޓީމަށް ކާމިޔާބު ކޮށްދިނީ ޖާޒީ ނަންބަރ 7 އިބްރާހިމް ހަމީޝް އެވެ. މިލަނޑަށް ފަހު ވެސް ދެޓީމަށްވެސް ލަނޑު ޖަހާނެ ރަނގަޅު ފުރުޞަޠު ތައް ލިބިގެން ދިޔައެވެ. މަރޮށި ޓީމަށް ލިބުނު ފުރުޞަތު ތަކުގެ ހުރަހަކަށްވީ ފުނަދޫ ޓީމުގެ ގޯލްކީޕަރެވެ.

މި މެޗުގެ މޮޅު ކުޅުންތެރިޔަކަށް ހޮވުނީ މެޗުގައި ގިނަ ސޭވްތަކެއް ކުރި ފުނަދޫ ޓީމުގެ ގޯލްކީޕަރު އިބްރާހިމް ނަޖީލެވެ. މިމެޗުން މޮޅުވި ފުނަދޫ މާދަމާ ނުކުންނާނީ ނަރުދުއާއި ދެކޮޅަށެވެ. މިދެ ޓީމަކީ މި މުބާރާތުގެ ފައިނަލްގައި މިދިޔަ އަހަރު ބައްދަލުކުރި ދެ ޓީމެވެ. މިމެޗުން ބަލިވި މަރޮށި ނުކުންނާނީ މިހާތަނަށް މި މުބާރާތުގެ ހުރިހާ މެޗުތަކެއް ކާމިޔާބު ކުރަމުން އަންނަ މިލަންދޫ ޓީމާއި ދެކޮޅަށެވެ.