“މިލައުތުރު ފުޓްސަލް ޗެލެންޖް 2023” ގެ ގުރޫޕް ބީ ގެ ސޯޅަވަނަ މެޗުގައި ބޮޑު ތަފާތަކުން ކޮމަންޑޫއިން މިދިޔަ އަހަރުގެ ރަނަރަޕް ނަރުދޫ ބަލިކޮށްފިއެވެ. ކޮމަންޑޫ ޓީމުގެ ފަރާތުން ހައިރާންވާފަދަ މޮޅު ކުޅުމެއް ފެނިގެންދިޔަ މެޗު އެ ޓީމުން ކާމިޔާބު ކުރީ 4 – 1 ންނެވެ.

މެޗު ފެށިގެން ފުރަތަމަ މިނެޓުގައި ކޮމަންޑޫ ޓީމުން އެ ޓީމުގެ ފުރަތަމަ ލަނޑު ކާމިޔާބު ކުރިއެވެ. މިލަނޑު އެ ޓީމަށް ކާމިޔާބު ކޮށްދިނީ އެ ޓީމުގެ ކެޕްޓަން އެވެ. އޭގެ ދެ މިނެޓު ފަހުން ކޮމަންޑޫ ޓީމުގެ ކީޕަރު އެއްލި ބޯޅައެއް އެއްފަހަރުން ގޯލަށް އަމާޒު ކޮށްލައިގެން ކޮމަންޑޫ ޓީމުގެ ކެޕްޓަން އިތުރު ލަނޑެއް ކާމިޔާބު ކޮށްދިނެވެ. ކައިރި ކައިރީ ޖެހި ދެލަނޑާއެކު ނަރުދޫ ޓީމު ޕުރެޝަރަށް ވައްޓާލިއެވެ.

ފުރަތަމަ ހާފުގެ 9 ވަނަ މިނެޓުގައި ކޮމަންޑޫ ޓީމުގެ ކެޕްޓަން ދިން ރީތި ޕާހެއް އިސްމާޢީލް އާޒިމް އެއްފަހަރުން ގޯލުގެ ދުރުކަނަށް އަމާޒު ކޮށްލައިގެން ކޮމަންޑޫން މެޗުގެ ތިންވަނަ ލަނޑު ކާމިޔާބުކޮށް ލީޑު ފުޅާކޮށްދިނެވެ. އޭގެ މިނެޓެއްފަހުން ނަރުދޫގެ 21 ނަންބަރު ނާއިޒު ލަނޑެއް ޖަހައިދިނެވެ. ފުރަތަމަ ހާފު ނިމުނީ 3 – 1 ން ކޮމަންޑޫ ކުރީގައި އޮވެގެންނެވެ.

މެޗުގެ ދެވަނަ ހާފު ފެށިގެން ފުރަތަމަ މިނެޓުގައި ތެރޭގައި ކޮމަންޑޫ ޓީމުން އިތުރު ލަނޑެއް ޖަހައި ލީޑު އިތުރަށް ފުޅާކޮށްދިނެވެ. މިލަނޑު އެ ޓީމަށް ކާމިޔާބު ކޮށްދިނީ ތިންވަނަ ލަނޑުވެސް ކާމިޔާބު ކޮށްދިން ޖާޒީ ނަންބަރ 10 އިސްމާޢީލް އާޒިމެވެ. މެޗުގެ ނަތީޖާ އަނބުރާލުމަށް ނަރުދޫއިން ކުރި މަސައްކަތުގެ ހުރަހަކަށްވީ މެޗުގައި އާދަޔާހިލާފު މޮޅު ކުޅުމެއް ދެއްކި ކޮމަންޑޫ ޓީމުގެ ކީޕަރެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ކޮމަންޑޫ ޓީމަށް ދެލަނޑު ކާމިޔާބު ކޮށްދީ މެޗުގައި މޮޅު ކުޅުމެއް ދެއްކި ކޮމަންޑޫ ޓީމުގެ ޖާޒީ ނަންބަރ 10 އިސްމާޢީލް އާޒިމެވެ. މިއީ މި މުބާރާތުގައި ކޮމަންޑޫ ޓީމުން ހޯދި ފުރަތަމަ މޮޅެވެ. ކޮމަންޑޫ އިން މި މުބާރާތުގައި މިހާރު ވަނީ ފަސް މެޗު ކުޅެ ފައެވެ. ގުރޫޕް ސުޓޭޖުގައި އެ ޓީމް ކުޅޭ ފަހު މެޗުގައި މާދަމާރޭ ނުކުންނާނީ މާއުނގޫދޫ އާއި ދެކޮޅަށެވެ.