ފ.ނިލަންދޫ ރަށްވެހި ގްރޫޕާ އެރަށު ޖަމިއްޔަތުލް ޝަބާބާއި ގުޅިގެން ޑިސެމްބަރު 26 ގައި ފެށުމަށް ހަމަޖެހިފައިވާ ރަށްވެހި ޗެލެންޖް ފުޓްބޯޅަ މުބާރާތުގައި ޖުމްލަ 6 ޓީމަކުން ބައިވެރިވެފައި ވާކަމަށް ރަށްވެހި ގްރޫޕުން މަޢުލޫމާތު ދެއެވެ.

މި ހިނގާ ނޮވެމްބަރ 20 ވަނަ ދުވަހުގެ ނިޔަލަށް ބައިވެރިވުމުގެ ފުރުޞަތު ހުޅުވާލުމުން ވަޤުތު ހަމަވިއިރު ބައިވެރިވެފައި ވަނީ ނިލަންދޫގެ 4 ޓީމާ ފީއަލީގެ ޓީމަކާއި ދ.މީދޫގެ ޓީމެކެވެ.

މިމުބާރާތުގައި ނިލަންދޫން ބައިވެރިވެފައި ވަނީ އެސް ސީ ފަހުލަވާނާއި، އެސްޖީސީ އާއި، ނިލަންދޫ ޔަންގް ޖެނެރޭޝަންގެ އިތުރުން ރޭވަންސް އެވެ. މީގެ އިތުރުން ބައިވެރި ވަނީ ދ. މީދޫ ފުޓްބޯލް ކްލަބާ ފީއަލީ ޑިވެލޮޕްމަންޓް ސޮސައިޓީއެވެ.

މި މުބާރާތުގެ ޗެމްޕިއަން ޓީމަށް 20000 ރުފިޔާގެ ފައިސާގެ އިނާމެއް ހުށަހަޅާފައި ވެއެވެ. އަދި މިމުބާރާތް މިފަހަރު ހުޅުވާލާފައި ވަނީ ފ.އަތޮޅު ރަށްތަކުގެ އިތުރުން ދ.އަތޮޅުގެ ބައެއް ރަށްރަށަށެވެ.