ޕީޕީއެމް/ޕީއެންސީގެ ރިޔާސީ ކެމްޕެއިންގައި އެންމެ އަޑު ހަރުކޮށް ގޮވި އެއް ވާހަކައަކީ ރައީސް ޔާމީން މިނިވަންކުރުމުގެ ވާހަކައެވެ. އެހެން ނަމަވެސް ރައީސް މުޢިއްޒު ހުވާ ކުރެއްވިތާ 9 ވަނައަށް ވީ ދުވަހު މިވަނީ އެކަން ނިމިއްޖެކަން އިޢުލާން ކުރައްވާފައެވެ.

ދިވެހިރާއްޖޭގެ ތަރައްޤީގެ ބާނީކަމަށް އެމީހުން ވަކާލާތުކުރި ރައީސް ވަނީ ބާކީކޮށް އެކަނިކޮށްލާފައެވެ. މިހާރު ބޭނުންވަނީ ޑރ. މުޢިއްޒުގެ ސަރުކާރުގައި ޙިމާޔަތުގައި ޢިއްޒަތާ އަރާމުގެ 5 އަހަރު ހޭދަކޮށްލާށެވެ. އަދި ރައީސް ޔާމީންގެ ޕޮޓޯކޮޅުގައި ބޯއަޅައިގެން ނިދިމީހުން ވެސް މިއަދު ތިބީ އެމަނިކުފާނަށް ފުރަގަސްދީގެންނެވެ. އެންމެ ވަފާތެރި ކެހިވެރިންގެ ގޮތުގައި ވަޒީރުކަމާ ކުންފުނިތަކުގެ ވެރިންގެ މަޤާމުގައި ފިސާރި ރަގަޅަށް އެމަނިކުފާނާ ދެކޮޅުވެރި ވެފައެވެ. ނުވިތާކަށް މިހާރު އޮތީ މަލާމާތާ ފުރައްސާރަ ކުރުމާ ރައްދު ދިނުމާ އިންޒާރުތައް ދިނުމެވެ. ލޯތްބެއް އިޙްތިރާމެއް ޤަދަރެއް މިހާރަކު ނެތް ފަދައެވެ.

ބައެއް މީހުން ހަދާން އައުކޮށްދެނީ އެމަނިކުފާނުގެ އަމިއްލަފުޅު ބޭބެއަށް ހެއްދެވި ގޮތެވެ. އަދި އެއީ ވާންވީގޮތަކަމަށާއި، އެމީހަކު ފޭހުނު އިލޮށިގަނޑެއް އެމީހެއްގެ ލޮލަށް ހެރޭނެކަމަށެވެ. އެގޮތުން ރައީސް ޔާމީން އަމިއްލަފުޅަށް ފޭހުނު އިލޮށިގަނޑު ލޮލަށް ހެރި، ކަތިވަޅި ގެއްލި މަރިއަނބު ގެއްލި ކޮށި ދަނޑު ވެސް ގެއްލުނީކަމަށެވެ. އަދި ތުނޑު ހަސަނަށް ވީވަރު ވެސް ރައީސް ޔާމީނަކަށް ނުވިކަމަށެވެ. ޕާޓީގެ ތެރެއަށް ވަތް މީދަލެއް ކުޅި ޕާޓީ ކައި ހުސްކޮށްލީކަމަށާއި، ރައީސް ޔާމީނަށް ތޮށިފުކެއްގެ މިންވަރު ވެސް ނުލިބުންކަމަށެވެ. އެންމެ ފަހުން އެފަކީރަށް ދެ ޕާޓީ ވެސް ދޫކޮށް ސުމަކުން ފަށަން ޖެހުނީއެވެ.