“މިލައުތުރު ފުޓްސަލް ޗެލެންޖް 2023” ގެ ގުރޫޕް ބީ ގެ ސޯޅަވަނަ މެޗުގައި ބޮޑު ތަފާތަކުން މިލަންދޫން މަރޮށި ބަލިކޮށްފިއެވެ. މިލަންދޫ ޓީމުގެ ފަރާތުން މޮޅު ކުޅުމެއް ފެނިގެންދިޔަ މެޗު އެ ޓީމުން ކާމިޔާބު ކުރީ 7 – 0 ގެ ނަތީޖާ އަކުންނެވެ.

މެޗުގެ ފުރަތަމަ ހާފުގައި މިލަންދޫ ޓީމުގެ ފަރާތުން ފަސްލަނޑު ވަނީ ފެނިގެން ގޮސްފައެވެ. މި ލަނޑުތައް އެ ޓީމަށް ކާމިޔާބު ކޮށްދިނީ އިސްމާޢީލް ފަތުޙީ، އިބްރާހިމް ޒާހީ އަދި އިބްރާހިމް ސިޔާމް އެވެ. އިބްރާހިމް ޒާހީ އަދި އިބްރާހިމް ސިޔާމް މިއިން ކޮންމެ ކުޅުންތެރިޔަކު ފުރަތަމަ ހާފުގައި ވަނީ ދެލަނޑު ޖަހާފައެވެ. ފުރަތަމަ ހާފު ނިމުނީ 5 – 0 ކުން މިލަންދޫ ކުރީގައި އޮވެގެންނެވެ.

މެޗުގެ ދެވަނަ ހާފު ގައި މިލަންދޫ ޓީމުގެ ފަރާތުން އިތުރު ދެލަނޑު ފެނިގެންދިޔައެވެ. ފުރަތަމަ ލަނޑު އެ ޓީމަށް ކާމިޔާބު ކޮށްދިނީ ޖާޒީ ނަންބަރ 18 ޢަލީ ސަމޫހުއެވެ. މެޗު ނިމެން 5 މިނެޓަށް ވެފައިވަނިކޮށް ފަހު ލަނޑު ޖަހައިދިނީ ޖާޒީ ނަންބަރ 10 އިބްރާހިމް ސިޔާމެވެ. އޭނާ ވަނީ މި މެޗުގައި ހެޓްރިކް ހަދާފައެވެ.

މި މުބާރާތުހެ ގުރޫޕް ސުޓޭޖުގައި މިލަންދޫ ޓީމުން ފަސް މެޗު ކުޅެފައިވާއިރު ހުރިހާ މެޗެއް ވަނީ ކާމިޔާބު ކޮށްފައެވެ. މުބާރާތުގެ މި ހިސާބަށް އައި އިރު އެ ޓީމުގެ ކޮޅަށް އެއްވެސް ލަނޑެއް ވަދެފައެއް ނުވެއެވެ. އެ ޓީމުން ޖުމްލަ 26 ލަނޑު ޖަހާފައިވާކަން ފާހަގަކޮށްލެވެއެވެ. އެއީ ޅައިމަގު ކޮޅަށް ޖެހި 7 ލަނޑާއި، ފުނަދޫ ކޮޅަށް ޖެހި 2 ލަނޑާއި، ކޮމަންޑޫ ކޮޅަށް ޖެހި 4 ލަނޑާއި، މާއުނގޫދޫ ކޮޅަށް ޖެހި 6 ލަނޑުގެ އިތުރުން މިއަދު މަރޮށި ކޮޅަށް ޖެހި 7 ލަނޑެވެ.

މި މެޗުގެ މޮޅު ކުޅުންތެރިޔަކަށް ހޮވުނީ މިލަންދޫ ޓީމަށް ދެލަނޑު ކާމިޔާބު ކޮށްދީ މެޗުގައި މޮޅު ކުޅުމެއް ދެއްކި މިލަންދޫ ޓީމުގެ ޖާޒީ ނަންބަރ 7 އިބްރާހިމް ޒާހީއެވެ. ގުރޫޕް ސުޓޭޖުގައި މިލަންދޫ ޓީމް ކުޅޭ ފަހު މެޗުގައި މާދަމާ ހަވީރު 16:00 ނުކުންނާނީ ނަރުދު އާއި ދެކޮޅަށެވެ.