“މިލައުތުރު ފުޓްސަލް ޗެލެންޖް 2023” ގެ ގުރޫޕް ބީ ގެ އަށާރަ ވަނަ މެޗުގައި މާއުނގޫދޫ އާއި ބައްދަލުކޮށް ހޯދި މޮޅާއި އެކު ކޮމަންޑޫ އިން މިއަހަރުގެ މުބާރާތް ނިންމާލައިފިއެވެ. މިމެޗު ކޮމަންޑޫން ކާމިޔާބު ކުރީ 6 – 1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގެ 8 ވަނަ މިނެޓުގައި ކޮމަންޑޫން ވަނީ މާއުނގޫދޫގެ ގޯލް ހުޅުވާލާފައެވެ. މިލަނޑު އެ ޓީމަށް ކާމިޔާބު ކޮށްދިނީ މެޗުގައި މޮޅުކުޅުމެއް ދެއްކި ޖާޒީ ނަންބަރ 10 އިސްމާޢީލް އާޒިމް އެވެ. އޭގެ 8 މިނެޓް ފަހުން މުޙައްމަދު އިނާޒް އިތުރު ލަނޑެއް ޖަހައި ކޮމަންޑޫން ލީޑު ފުޅާކުރިއެވެ. މެޗުގެ ފުރަތަމަ ހާފް ނިމުނީ 2-0 ކުން ކޮމަންޑޫ ކުރީގައި އޮވެގެންނެވެ.
މެޗުގެ ދެވަނަ ހާފުގައިވެސް މޮޅަށްކުޅެ ގިނަ ހަމާލާތައް އުފައްދާފައިވަނީ ކޮމަންޑޫ ޓީމުންނެވެ. މި ހާފުގައި ކޮމަންޑޫން އިތުރު 4 ލަނޑު ވަނީ ޖަހާފައެވެ. ފުރަތަމަ ލަނޑު ޖެހި އިސްމާޢީލް އާޒިމް ދެލަނޑު ޖަހާވަނީ ހެޓްރިކް ހަދާފައެވެ. މީގެ އިތުރުން މުޙައްމަދު އިނާޒް އަދި ނާހިޒް ޢަލީ ވަނީ ލަނޑުޖަހާފައެވެ. މާއުނގޫދޫ ގެ ހަމައެކަނި ލަނޑު ދެވަނަ ހާފުގެ 13 ވަނަ މިނެޓުގައި ކާމިޔާބު ކޮށްދިނީ އިސްމާޢީލް ސިނާނެވެ.

މިމެޗުން މޮޅުވި ކޮމަންޑޫ ޓީމުން ވަނީ ކުޅުން ހަމެޗުގެ ތެރެއިން 2 މެޗު ކާމިޔާބުކޮށް 6 ޕޮއިންޓު ހޯދާ ފައެވެ. މިމެޗާއެކު ގުރޫޕް ސުޓޭޖު ފަހަނަ އަޅައި ނުދެވި ކޮމަންޑޫ އަށް ވަނީ މުބާރާތް ނިމިފައެވެ. މިމެޗުން ބަލިވި މާއުނގޫދޫ އަށް ކުޅުނު ފަސްމެޗުން ކާމިޔާބު ކުރެވުނީ އެންމެ މެޗެކެވެ. ބާކީ 4 މެޗުން ވަނީ ބަލިވެފައެވެ. އެ ޓީމަށް ބާކީ އޮތީ މިދިޔަ އަހަރުގެ ޗެންޕިއަން ފުނަދޫ ގެ މެޗު އެކަންޏެވެ. އެމެޗު ކުޅުމަށް ހަމަޖެހިފައިވަނީ މާދަމާ ހަވީރު އެވެ. މިއާއެކު މާއުނގޫދޫ އަށް ވެސް ގުރޫޕް ސުޓޭޖު ފަހަނަ އަޅައި ދިއުމުގެ ފުރުޞަތު ވަނީ ގެއްލިފައެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ކޮމަންޑޫ ޓީމަށް މި މެޗުގައި 3 ލަނޑު ކާމިޔާބު ކޮށްދިން އެ ޓީމުގެ ޖާޒީ ނަންބަރ 10 އިސްމާޢީލް އާޒިމެވެ.