“މިލައުތުރު ފުޓްސަލް މުބާރާތް 2023” ގެ ގުރޫޕް ބީ އިން ކުއާރޓާފައިނަލަށް ދަތުރުކުރި ޓީމުތަށް ކަށަވަރު ވެއްޖެއެވެ. ގުރޫޕް ބީ ގައި ހިމެނޭ ޓީމުތަކުން ކުއާރޓާފައިނަލަށް ދަތުރުކޮށްފައިވަނީ އެންމެ ފަހުގެ ޗެންޕިއަން ފުނަދޫ، އެންމެފަހުގެ ރަނަރަޕް ނަރުދޫ، މިލަންދޫގެ އިތުރުން ޅައިމަގެވެ.

ޗެންޕިއަން ފުނަދޫ ކުއާރޓާފައިނަލްގެ ޖާގައެއް ކަށަވަރު ކުރީ ކުޅުނު 5 މެޗުގެ ތެރެއިން 3 މެޗު ކާމިޔާބު ކޮށް އެއް މެޗު އެއްވަރު ކޮށްގެން ލިބުނު 10 ޕޮއިންޓާއި އެކުއެވެ. އެ ޓީމުން ވަނީ ކޮމަންޑޫ ، މަރޮށި އަދި ޅައިމަގު ބަލިކޮށްފައެވެ. ނަރުދޫ އާއި ބައްދަލުކުރި މެޗު ނިމުނީ އެއްވަރު ވެގެންނެވެ. އެ ޓީމު ބަލިވީ މިލަންދޫ އަތުންނެވެ. އެ ޓީމަށް ބާކީ އަދި އެއް މެޗު އެބައޮތެވެ. އެއީ މާއުނގޫދޫ ދެކޮޅަށް ކުޅެން ޖެހޭ މެޗެވެ. މިމެޗު ކުޅުމަށް ހަމަޖެހިފައިވާ މާދަމާ ހަވީރު އެވެ. މިވަގުތު އެ ޓީމު އޮތީ ޕޮއިންޓު ޓޭބަލް ގެ ދެވަނައިގައެވެ.

މިދިޔަ އަހަރުގެ ރަނަރަޕް ނަރުދޫ ކުއާރޓާފައިނަލްގެ ޖާގައެއް ކަށަވަރު ކުރީ ކުޅުނު ފަސްމެޗުން ދެމެޗު ކާމިޔާބުކޮށް ދެމެޗު އެއްވަރު ކޮށްގެން ހޯދި 8 ޕޮއިންޓާއެކުއެވެ. އެޓީމުން ވަނީ މާއުނގޫދޫ އަދި މަރޮށި ބަލިކޮށްފައެވެ. ފުނަދޫ އަދި ޅައިމަގާއި ބައްދަލު ކުރި މެޗު ނިމުނީ އެއްވަރު ވެގެންނެވެ. ކޮމަންޑޫ މެޗުންވަނީ ބަލިވެފައެވެ. އެ ޓީމަށް ބާކީ އޮތީ މި މުބާރާތުގައި މޮޅުކުޅުމެއް ދައްކަމުން އަންނަ މިލަންދޫ މެޗެވެ. މިމެޗު މާދަމާ ހަވީރު 16:00 ގައި ކުޅުމަށް ވަނީ ހަމަޖެހިފައެވެ.

މިލަންދޫ ޓީމުން ކުއާރޓާފައިނަލްގެ ޖާގައެއް ކަށަވަރު ކުރީ ކުޅުނު ފަސްމެޗުގެ ތެރެއިން ހުރިހާ މެޗެއް ކާމިޔާބުކޮށް ސައްތައިން ސައްތައިގެ ރިކޯޑަކާއެކު އެވެ. އެ ޓީމު ކޮޅަށް އެއްވެސް ޓީމަކަށް ލަނޑެއްވެސް ޖެހިފައެއް ނުވެއެވެ. އެޓީމުން މިހާތަނަށް ވަނީ 26 ލަނޑު ޖަހާފައެވެ. އެޓީމުން ވަނީ ޅައިމަގު ކޮޅަށް 7 ލަނޑު، ފުނަދޫ ކޮޅަށް 2 ލަނޑު، ކޮމަންޑޫ ކޮޅަށް 4 ލަނޑު، މާއުނގޫދޫ ކޮޅަށް 6 ލަނޑު އަދި މަރޮށި ކޮޅަށް 7 ލަނޑު ޖަހާފައެވެ. އެ ޓީމަށް ބާކީ އޮތީ މާދަމާ ހަވީރު 16:00 އޮތް ނަރުދޫ މެޗެވެ.

ޅައިމަގުން ކުއާރޓާފައިނަލުގެ ޖާގައެއް ކަށަވަރު ކުރީ ކުޅުނު ފަސްމެޗުގެ ތެރެއިން 2 މެޗު ކާމިޔާބުކޮށް އެއް މެޗު އެއްވަރު ކޮށްގެން ހޯދި 7 ޕޮއިންޓާއި އެކު އެވެ. އެޓީމުން ވަނީ ކޮމަންޑޫ އަދި މާއުނގޫދޫ ބަލިކޮށްފައެވެ. ނަރުދުއާއި ބައްދަލުކުރި މެޗު ނިމުނީ އެއްވަރު ވެގެންނެވެ. އެޓީމުން ބަލިވީ މިލަންދޫ އަދި ފުނަދޫ އަތުންނެވެ. އެ ޓީމަށް ބާކީ އޮތީ މާދަމާ ރޭ އޮތް މަރޮށި މެޗެވެ.

މި މުބާރާތުގެ ކުއާރޓާފައިނަލް މެޗުތައް ވެސް ކުރިއަށް ދާނީ ގޮއިދޫ އަދި މާއުނގޫދޫ ގައެވެ. ކުއާރޓާފައިނަލްގެ 1 ވަނަ މެޗާއި 3 ވަނަ މެޗު ކުޅުމަށް ހަމަޖެހިފައިވަނީ ގޮއިދޫގައެވެ. އަދި 2 ވަނަ މެޗާއި 4 ވަނަ މެޗު ކުޅުމަށް ހަމަޖެހިފައިވަނީ މާއުނގޫދޫ ގައެވެ. ގުރޫޕް ބީ ގެ ޕޮއިންޓު ޓޭބަލް މިވަގުތު އޮތް ގޮތުން މިލަންދޫ ޓީމުގެ މެޗު އޮންނާނީ މާއުނގޫދޫ ގައެވެ. ދެން މާއުނގޫދޫ ގައި ކުއާރޓާފައިނަލްގެ މެޗު ކުޅޭނީ މި ގުރޫޕްގެ 3 ވަނައަށްދާ ޓީމެވެ. މާދަމާ މެޗުގެ ނަތީޖާ ނުކުންނަ ގޮތަކުން މި ގުރޫޕްގެ 3 ވަނަ ޓީމަށް ބަދަލު އައުމުގެ ފުރުޞަތު އެބައޮތެވެ.